Read Pangasinan Salmo 73 Bible Online

Salmo 73 - Pangasinan bible

Salmo 73

¹"Peteg a say Dios maung so ipapanengneng tod Israel, diad saray malinis so puso ra.

²"Balet abalang ko lawari so panagmatalek ko; ngalngalin naandi so pananisiak,

³"ta angimon ak ed saray mapaatagey, nen anengneng kon onaaligwas iray totoon maoges.

⁴"Anggapoy ansakit a likliknaen da ra yan totoo; maksil tan mabiskeg so kalamanan da.

⁵"Aliwa ran singa arum a totoon maniirap; aliwa ran singa arum a totoon nagugunigon.

⁶"Kanyan say panagpaatagey da et singa kadinan akasolung ed saray beklew da tan say panagduksa ra et singa kawes ya akakolibemben ed sikara;

⁷"ompapaway so kaogsan ed kapusoan da, tan ag ontotondan mamplano na kaogsan iray kanunotan da.

⁸"Elek-elekan da ray arum a totoo tan totongtongen day nipaakar ed kaogsan; mapaatagey ira tan iplaplano ray pamairap dad arum a totoo.

⁹"Mansasalita ray maoges sumpad Dios a walad tawen tan malastog iran mangigaganggan ed saray totoon walad tapew na dalin,

¹⁰et diad ontan anggan saray totooy Dios onsisingger irad sikara tan mapalaloy pananisia rad amin ya ibabaga ra.

¹¹Kuanda, Ag naamtaan na Dios, ag nakabatan na Sankatageyan.

¹²Ontan iray totoon maoges. Anta daakan lay walad sikara, mandakel lan mandakel niy kayaryan da.

¹³Anggapoy kakanaan sirin so impansiansiak a malinis tan anggapoy kasalanan?

¹⁴O Dios, impanirap mo ak lawas; kapag kabwasan dinusa mo ak!

¹⁵No onya ray imbagak, singa ak aliwan sakey ed saray totoom.

¹⁶Ginawak so anggaay nayaryan ko a talusan yan problima, balet agaylay irap a talusan

¹⁷anggad linmoob ak ed Timplom. Atalusan kod satan no antoy pansumpalan da ray totoon maoges.

¹⁸Andi-duaruwan iyakar mo rad andanglel iran pasen tan ipatumbam iran naderal.

¹⁹Bigla ran naderal; makapataktakot so pansumpalan da.

²⁰Singa ra kogip a naandipat lad kabwasan; no ombangon ka, O Katawan, naandi la ra.

²¹Nen agoloy isip ko, tan apasakitay liknaan ko,

²²nagmaliw ak ya ambagel a singa ayep ag ta ka atalusan.

²³Anggaman ontan siansian kaiba ta ka lawas, tan itatabin mo ak.

²⁴Iwawanwan ak na pananimbawam et diad kaonuran, mapagalang ya awaten mo ak.

²⁵Anto niy kayaryan kod tawen no ag say sika? Bangta kayaryan ta ka anto niy pampilalekan ko diad tapew na dalin?

²⁶Nayarin onkapoy so kanunotan tan laman ko, balet say Dios so biskeg ko; sikato labat so nakaukolan ko.

²⁷Saray mangikakaindan ed sika et andi-saew ya ompatey ira; deralen mo ray aliwan matoor ed sika.

²⁸Balet para siak, agaylay abig so maasingger ed Dios, say paiyagel ed Katawan a Dios; say pangibawag na amin a ginagawa to!