Read Pangasinan Salmo 80 Bible Online

Salmo 80 - Pangasinan bible

Salmo 80

¹"Dengel mo kami pa, O Pumapastol na Israel; talineng mo kami pa, sika a pangulo da ray karnirom. Sika a manyodyorung ed tronom diad tagey da ray kirubin,

²"ipaamtam pay sikan dili ed saray tribu di Efraim, Benjamin, tan Manases. Ipanengneng mo pad sikami so pakayarim; gala pa ta ilaban mo kami!

³"Papawil mo kami pa, O Dios! Ipanengneng mo pad sikami so panangasim et nilaban kami!

⁴"Kapigan, O Katawan a Dios a Makapanyarin-amin, so pangangga na pasnuk mod pikakasi da ray totoom?

⁵"Ermen so inter mon kanen mi, tan ontan lay karakel na luan inter mon inomen mi.

⁶"Inyabuloy mon panlalabanan na saray kakaabay min bansa so dalin mo; papabaingan kami na saray kalaban mi.

⁷"Papawil mo kami pa, O Dios a Makapanyarin-amin! Ipanengneng mo pay panangasim ed sikami, et nilaban kami!

⁸"Impaway mod Egipto so sakey a wakal na ubas; pinataynan mo ray arum a bansa, insan mo intanem ed dalin da.

⁹"Pinalinan moy sakey a pasen a tobuan to; inmaralem iray lamut to tan kinmayamkam ed intiron dalin.

¹⁰Siniruman to ray kapokdulan, saray sanga to kinobutan da ray ankakabaleg a kiew a sidro.

¹¹Saray sanga to asabi ray Dayat na Mediteraneo, tan anggad Ilog na Eufrates.

¹²Akin et tinebag mo ray padir ed kaliber-liber to? Kanyan natan, amin da ray onlalabas et natakew da ray bunga to;

¹³naalibuk tan natumba na saray animolok, tan nabwag na saray ayayep ed katakelan.

¹⁴Lingaw mo kami pa, O Dios a Makapanyarin-amin! Manlapud tawen osdungan mo kami pa; gala pa ta ilaban mo ray totoom!

¹⁵Gala pa ta ilaban mo yan ubas ya intanem mo, sayan malangwer nin ubas a pinabaleg mon mabisbiskeg!

¹⁶Pinoolan na saray kalaban mi tan binatang da; moldagatan mo pa rad pasnuk mo tan patey mo ra!

¹⁷Iyagel tan asikasom pa ray totoom a pinilim, say bansan ginawam a mabisbiskeg.

¹⁸Ag mi ka lan balut ibeneg; pansiansia mo kami pan mabilay, et idayew mi ka.

¹⁹Papawil mo kami pa, O Katawan a Dios a Makapanyarin-amin. Ipanengneng mo pad sikami so panangasim, et nilaban kami!