Read Pangasinan Salmo 83 Bible Online

Salmo 83 - Pangasinan bible

Salmo 83

¹"O Dios, ag ka labat pa mareereen; ag ka pa mareereen, o anggapoy eseesel!

²"Nengneng mo! Manggogolo ray kalaban mo tan onsusumpa ray mamobosul ed sika.

³"Iplaplano ray panilib dad saray totoom; mankokomplut ira sumpad saray iyaagel mo.

⁴"Kuanda, Gali dia, deralen tayoy bansa ra, pian nalingwanan lan andi-anggaan so Israel.

⁵"Onaabubon iran amin ed plano ra, tan nankakasakey iran onsumpad sika:

⁶"saray totood Edom tan saray Ismaelita; saray taga Moab tan saray Agareno;

⁷"saray taga Gebal, Ammon, tan Amalec; saray taga Filistia tan Tiro.

⁸"Saray taga Asiria ya akimoyung met irad sikara; mabiskeg ira yan kaiba na saray kabyangay boleg nen Lot.

⁹"Gawam pad sikaray ginawam ed saray Madianita, tan diad kindi Sisera tan Jabin, diad Ilog na Kison.

¹⁰Tinalom irad Endor, tan aboluk-boluk ed dalin iray bangkay da.

¹¹Gawam pad saray pangulo ra so ginawam ed kindi Oreb, tan Zeeb; talom ya amin iray manoley da a singa impanalom ed kindi Zeba tan Zalmuna,

¹²ya angikuan, Kayaryanen tayo so dalin a kien na Dios.

¹³Dios ko, ibuybuyak mo pa ran singa dabuk, singa taep ya ipalir-palir na dagem.

¹⁴No panoy pamopool na apoy ed katakelan, singa panisinit na dalang ed kapokdulan,

¹⁵ontan pa met so pangosil mod sikara diad panamegley na bagyom, tan taktakot mo ra diad panamegley na mabiskeg a dagem mo.

¹⁶Katawan, sakbungan mo pa na kababaingan so kalupaan da, tan ipabirbir mod sikaray pakayarim.

¹⁷Andi-angga komun a natalo tan nataktakot ira; ompatey ira komun a naplag a sigput ed kababaingan.

¹⁸Naamtaan da komun a sika labat so Katawan say Sankatageyan a manoley ed sankamundoan.