Read Pangasinan Salmo 84 Bible Online

Salmo 84 - Pangasinan bible

Salmo 84

¹"Agaylay kaabigan na Timplom, O Makapanyarin-amin a Katawan!

²"Labalabay kon tuloy so makaloob diman! Pampilpilalekan koy manayam ed Timplo na Katawan. Diad intiron pusok sililiket ak a mankankanta ed mabilay a Dios.

³"Anggan saray manok ed tagey nanggagawa ray obung da, tan saray anuyaw walay panaayaman da; isisinup da ray sibong da ed abay na altar mo, O Katawan a Makapanyarin-amin, arik tan Dios ko.

⁴"Agaylay liket da ray manaayam ed abung mo, mankakanta ran naynay na pangidayew dad sika!

⁵"Agaylay liket da ray totoon manlalapud sikay biskeg da, tan mampipilalek iran onla a mangidayew ed sika diad Palandey na Sion.

⁶"Nen ondadalan ed amagan patar na Baca, ompapaway diman iray sobul; say masakbay ya oran loluaken to na danum.

⁷"Diad panaakar da lalon ombibiskeg ira; nanengneng dad Sion so Dios da ray diriyos!

⁸"Dengel mo pay pikakasik, O Katawan a Dios a Makapanyarin-amin; talineng ka pa, O Dios nen Jacob!

⁹"Bindisionan mo pay ari mi O Dios, say ari a pinilim!

¹⁰Say sanagew a panayam ed Timplom et magmaung ni nen say sanlibon agew a panayam ed arum a pasen; labay ko niy manalagey ed puirtay abung na Dios ko, nen say manayam ed tulda na saray totoon maoges.

¹¹Say Katawan a Dios so manangyagel tan mapagalang ya ari tayo, kakasian to tayo tan iitdan to itayoy kagalangan. Ag to isisiblet so antokaman a kaabigan ed saray manggagaway kaptekan.

¹²Agaylay liket da ray manmamatalek ed sika, O Katawan a Makapanyarin-amin!