Read Pangasinan Salmo 86 Bible Online

Salmo 86 - Pangasinan bible

Salmo 86

¹"Dengel mo ak pa, Katawan, tan ebatan mo ak, ta makapoy ak tan wala ak ed pankaukolan.

²"Iyagel mo ak pad patey, ta matoor ak ed sika; ilaban mo ak pa, ta managlingkur mo ak tan manmamatalek ak ed sika.

³"Sikay Dios ko, kanyan kasian mo ak pa; mikakasi ak lawas ed sika.

⁴"Paliket mo ak pa a managlingkur mo, Katawan, ta ontatagey iray pikakasik ed sika.

⁵"Katawan, maung tan manamirdona ka, napno kay ag mangoman a panangaro ed amin da ray mampipikasid sika.

⁶"Dengel mo pay pikakasik, Katawan; talineng mo pay ikekerew koy tulong.

⁷"Ontatawag ak ed sika no panaoy gunigon, lapud eebatan moy pikakasik.

⁸"Anggapod saray diriyos so miparad sika, Katawan, anggapoy siopaman a makagawa ed saray ginawam.

⁹"Amin da ray bansan pinapalsam ondago ra tan ondakmomo rad sika. Idayew day inkatalonggaring mo.

¹⁰Sikay makapanyari tan manggagawa ka ray pakelaw; bukor mo so Dios.

¹¹Katawan, ibangat mo ak pad labay mon gawaen ko, et matoor ta kan onuren; ibangat mo ak pan manlingkur ed sika diad intiron pusok.

¹²Idayew ta kad intiron pusok, Katawan a Dios ko, tan ibawag kon ando lan ando so inkatalonggaring mo.

¹³Agaylay kabaleg so ag mangoman a panangarom ed siak! Inlaban mo ak ed lobuk.

¹⁴O Dios, ondadagon onsumpad siak iray mapaatagey a totoo; labay ak a pateyen na sakey ya olup na totoon maruksa, totoon ag mangitaltalek ed sika.

¹⁵Balet sika, Katawan, mapangasi tan maaro kan Dios, maanos ka, maabagey tan matoor ka lawas.

¹⁶Lingaw mo ak pa tan kasian mo ak; pabiskeg mo ak pa a managlingkur mo, lapud lilingkuran ta ka a singa ginawa nen inak.

¹⁷Katawan, ipanengneng mo pad siak so pakapatnagay kaabigan mo; pian nabaingan iray mamobosul ed siak, diad pakanengneng dan niligliwa tan tinulongan mo ak.