Read Pangasinan Salmo 88 Bible Online

Salmo 88 - Pangasinan bible

Salmo 88

¹"Katawan a Dios a manangilaban ko, no agew onkekerew ak na tulong ed sika, tan no labi onaasingger ak ed sika.

²"Dengel mo pay pikakasik; talineng mo pay pikekerew ko na tulong!

³"Amayamay iray sinmabin gunigon ko, kanyan manasingger ak lad lobuk.

⁴"Singa ak saray ngalngali la ompatey; naandi lan amiy biskeg ko.

⁵"Singa ak la nikaindan ed kawalaan da ray inaatey; singa ak saray pinapatey ya akarokul ed kalobukan da, ya ag mo la ran balut nanununotan, tan ag mo la ra natulongan.

⁶"Insorub mo ak ed dalem na lobuk, diad sankabilongetan tan sankaaralem ya abut.

⁷"Say pasnuk mo ambelat ya ondedetdet ed siak, tan napapairap ak a maung ed silong na daluyoy pasnuk mo.

⁸"Sikay sengegan na impangikaindan ed siak na saray kakaarok; impagmaliw mo ak a makarimdimla ed sikara. Nipokuk ak kanyan ag ak la makapaway;

⁹"makapoy lay pakanengneng ko lapud kakairapan ko. Katawan, inagew-agew a tatawagan ta ka tan yaatagey ko ray limak a mampipikasid sika.

¹⁰Manggagawa ka na saray milagro a para saray inaatey? Ombabangon tan mangidadayew irad sika?

¹¹Nibabawag ed lobuk so ag mangoman a panangarom? Diad pasen a pakadudusaan na saray inaatey nibabawag so katooran mo?

¹²Nakakabatan ed ambilonget a pasen iray milagrom odino say kaabigan mo nanenengneng ed dalin na saray alingwanan la?

¹³Balet siak, Katawan, onkekerew ak ed sika na tulong; kapag kabwasan mampipikasi ak ed sika.

¹⁴Akin et ipopolisay mo ak, Katawan? Akin et iyaamutan mo ak?

¹⁵Nanlapu lad impanogaw ko, maniirap ak tan ngalngali ak ompatey; makapkapoy ak la lapud belat na panagdusam ed siak,

¹⁶Dedetdetan ak na mapalalon petang na olom; dederalen ak na saray makapataktakot a panagkabil mo.

¹⁷Singa ra delap a manliliktub lawas ed siak; onaasingger ira ya onlalakub ed siak.

¹⁸Tinanggoyur mon ikaindan ak na saray malmalet a kakaarok; bilonget labat so akeraan a kaibak.