Read Pangasinan Salmo 9 Bible Online

Salmo 9 - Pangasinan bible

Salmo 9

¹"Katawan, misalamat ak ed sika diad intiron pusok; ibawag koy nipaakar ed amin da ray makapakelaw a ginagawam.

²"Lapud sika malikeliket ak a mankanta. Kantaan kay pangidayew, O Sankatageyan a Dios!

³"No ompanengneng ka, ompoliktar iray kalaban ko; natumba tan ompatey ira.

⁴"Matonung tan maptek so panagsintinsiam; insintinsiam ya anggapoy kasalanan ko.

⁵"Dinusam iray totoon ag manisiad sika tan dineral mo ray totoon maoges; ag la ran balut nanunotan.

⁶"Angga lad angga ya aderal iray kalaban mi. Dineral mo ray siudad da, tan sigput la ran alingwanan.

⁷"Balet say Katawan et ari ya anggad angga; imparaan to lay trono ton panintinsiaan to.

⁸"Matonung so panooley tod sankamundoan; maptek so panisintinsia tod saray katoowan.

⁹"Say Katawan so salimbeng da ray napapairap; sikatoy napiregan no panaoy segsegang.

¹⁰Manmatalek ed sika, Katawan, iray makapikabat ed sika; ag mo ibabatikan iray ondaragod sika.

¹¹Kantaan yoy pangidayew so Katawan a manaayam ed Sion! Ibawag yod saray bansa iray gawgawa to!

¹²Nununoten na Dios iray maniirap; ag to lilingwanan so ey-ey da, tan dudusaen to ray mamapasegsegang ed sikara.

¹³Kasian mo ak pa, O Katawan! Nengneng mo pa so paniirap ko ya iiter na saray kalaban ko! Ipaliis mo ak pad patey, O Katawan,

¹⁴pian nayarian koy ontalindeg ed arap da ray totood Jerusalem, tan nibawag kod sikaray makasengeg na pangidadayew kod sika. Manliket ak ta inlaban mo ak.

¹⁵Saray ag manisiad Dios napepelag irad abut a kinotkotan da; naeerel irad patit ya inlira da.

¹⁶Impaamtay Katawan so sikaton dili diad panamegley da ray matonung a pananintinsia to, tan apatitan iray maoges a totoo ed dilin gawgawa ra.

¹⁷Patey so pansumpalan na amin da ray totoon maoges, amin da ray mangipopolisay ed Dios.

¹⁸Ag nalingwanan lawas iray mairap-bilay; ag naekal ed anggad angga so ilalo da ray walad kairapan.

¹⁹Alagey ka, O Katawan! Ag ka patatalod saray totoo! Tipon mo pad arap mo iray ag manisiad sika tan sintinsiaan mo ra.

²⁰Patakot mo pa ra, Katawan; ipaamtam ed sikara a totoo ran ompatey.