Read Pangasinan Salmo 91 Bible Online

Salmo 91 - Pangasinan bible

Salmo 91

¹"Siopamay onlan onsalimbeng ed Katawan, siopamay mansiansiad silong na panangyagel na Makapanyarin-amin,

²"nayarian ton ibagad Katawan, Sikay salimbeng tan manangyagel ko! Sikay Dios ko, sika so panmamatalekan ko.

³"Andi-saew ya ipaliis to kad amin a maamut a kaatapan, tan diad amin a makapatey iran salot.

⁴"Sayakopen to kad saray payak to; arawi kad kaatapan diad silong na panangasikaso to; iyagel tan ilaban ka na inkatoor to.

⁵"Ag mo nepeg so ontakot ed saray kaatapan no labi, odino diad biglan idogpa na saray kalaban no agew,

⁶"odino diad saray salot ya onsabi no ambilonget, odino diad saray kaogsan a mamatey no maliwawa.

⁷"Anggan bilang sanlibon totooy natumban inatey ed abay mo, samplon libo ed kaliber-liber mo, anggapoy maoges a nagawad sika.

⁸"Onnengneng ka et naimatunan mo no panoy kadusa da ray totoon maoges.

⁹"Lapud impasen mon manangyagel moy–Katawan, tan manangilaban moy Sankatageyan,

¹⁰anggapoy maoges a nagawad sika, tan anggapoy inkaruksan nagawad abay na abung mo.

¹¹Iganggan na Dios iray anghil ton mangasikasod sika, tan mangyagel ed sikad inerman a laen mo.

¹²Ampayaen da kad lima ra, pian diad bato anggan saray salim ag mo ra nitopa.

¹³Gatinan mo ray lion tan saray oleg, saray masesebeg a lion tan saray nanditan oleg.

¹⁴Kuay Dios, Ilaban ko ray mangaarod siak, tan iyagel ko ray mamibirbir ed siak a Katawan.

¹⁵No ontawag irad siak ebatan ko ra; no wala rad gunigon ibaan ko ra. Iyagel tan pagalangan ko ra.

¹⁶Tumangan ko ra na andokey a bilay, tan ilaban ko ra.