Read Pangasinan Salmo 92 Bible Online

Salmo 92 - Pangasinan bible

Salmo 92

¹"Maabig so misalamat ed sika, O Katawan, say pankanta a pamagalang ed sika, O Dios a Sankatageyan,

²"say pangibawag a kinabwasan na ag mangoman a panangarom, tan say pangibawag a nilabi-labi na inkatoor mo,

³"ya olupen na togtog na nandeles a kagawaan na musika, tan say laineng na arpa.

⁴"Katawan, paliliketen ak na saray makapanyarin gawgawam; lapud saray ginagawam, mankakanta ak ed liket ko.

⁵"Matalonggaring a tuloy iray gawgawam, Katawan! Agaylay kaaralem na saray nunot mo!

⁶"Say makulang-kulang ag to natalusan tan say ambagel ag to natebek

⁷"a nayarin ombaleg a singa dikarika iray totoon maoges, tan onaligwas iray amin a managgaway kaogsan; anggaman ontan, sigput so kaderal da,

⁸"balet sika, Katawan, so anggad anggan sankatageyan.

⁹"Amta mi ya ompatey iray kalaban mo, tan natalo ya amin iray totoon maoges.

¹⁰Pinabiskeg mo ak a singa kalakyan a bakad katakelan; binindisionan mo ak na liket.

¹¹Anengneng koy inkatalo da ray kalaban ko tan arengel koy tawag da ray totoon maoges.

¹²Onsalumpapak a singa kiew a palmira iray matonung a totoo; ombaleg iran singa kiew a sidro na Libano.

¹³Singa ra kiew ya intanem ed abung na Katawan, ya onsasalumpapak ed Timplo na Dios tayo;

¹⁴mambubunga ni ra, anggan matakken la ra; lawas mabisbiskeg tan mabona-bona ra.

¹⁵Dia nanengneng a matonung so Katawan, anggapoy kaogsan ed sikato a manangyagel ko.