Read Pangasinan SARAY PROBIRBIO 1 Bible Online

SARAY PROBIRBIO 1 - Pangasinan bible

SARAY PROBIRBIO 1

¹"Saraya so probirbio nen Solomon a lakin anak nen David tan ari na Israel.

²"Makatulong irad sikayo ed pakabirbir yod kakabatan tan maung a simbawa, tan diad pakatalus yod saray balikas a walaan na aralem a kabaliksan.

³"Nibangat da kayo no panoy pambilay yon makabat, tan no panoy pagmaliw yon matwa, matonung, tan maptek.

⁴"Napagmaliw dan marunong iray anggapoy salsalid panagbilay, tan nibangat day pakatalus tan kakabatan ed saray walad kalangweran.

⁵"Sarayan probirbio nayarian da ya anggan aruman so pakatalus da ray makabat lan totoo, tan nayarian dan iwanwan iray walay aral,

⁶"pian natalusan da ray niamut a kabaliksan da ray probirbio tan saray probliman itetepet da ray makabat a totoo.

⁷"Pian nawalaan kay pakatalus, nepeg mon galangen ya onona so Katawan. Saray makulang-kulang babalawen da so kakabatan tan ag da labay so manaral.

⁸"Anak ko, dengel moy ibabaga na amam tan inam.

⁹"Say bangat da et pamaungen toy ogalim a singa pamarakep ed nengneng mo na balibalin sombriro odino kolintas.

¹⁰Anak ko, no tuksoen ka na saray makasalanan, ag ka onaabuloy.

¹¹No bilang ta ikuanda, Gala, ta mananap itayoy pateyen tayon too! Dogpaan tayo ray totoon anggapoy kasalanan, pian walay panliketan tayo!

¹²Nayarin mabilabilay tan mabisbiskeg ira no narumog tayo ra, balet kasiput tayo naoyus lay bilay da!

¹³Makarumog tayoy mabmabli ran bengatla, tan panoen tayo ray kaabugan tayo na saray asamsam!

¹⁴Gala, mila kad sikami, ta panaapagan tin amin iray natakew tayo.

¹⁵Anak ko, ag ka mimilad saray ontan a totoo. Arawian mo ra.

¹⁶Magangganat iran manggaway kaogsan. Mammainomay day mamatey.

¹⁷Anggapoy kana na pangipanat moy iket no sankanengneng na manok a labay mon erelen.

¹⁸Balet saray ontan a totoo et papatitan day sikaran dili; diad dilin patit day pateyan da.

¹⁹Say tulisan pateyen na inkatulisan toonyay pansumpalan na siopaman a toon mambibilay onung ed inkaruksa to.

²⁰Dengel kayo! Mankokolyaot ed saray dalan tan diad saray tindaan so kakabatan,

²¹maksil ya ontatawag diad saray puirtay siudad, tan diad inerman a pantitiponan na saray totoo:

²²Makulang-kulang a totoo! Anggad kapigan so pansiansia yon makulang-kulang? Kapigan so itonda na panluludlurey yod pakaamta? Ag kayon balut makaaral?

²³Dengel kayo no pampasnukan ta kayo; itdan ta kayoy maung a simbawa tan inagnag kod sikayoy pakatalus ko.

²⁴Tinatawag ta kayo, balet ag kayo ondengel; iniimbitaan ta kayon ondago balet ag kayo mangasasikaso.

²⁵Ag yo dinengel iray amin a simbawak tan ag yo labay so papetek ed siak.

²⁶Kanyan no onsabid sikayoy gunigon, elekan ta kayo. Ludlureyen ta kayo no nasabian kayoy takot,

²⁷singa mabiskeg a bagyo ya onsabid sikayo a sankaawit to ray masebeg tan maksil a dagem a manggunigon ed sikayo, et nairapan tan pangaskasiyan kayo.

²⁸Diad satan ontawag kayod kakabatan, balet ag ak onebat. Nayarin anapen yo ak ed inerman a pasen, balet ag yo ak narumog.

²⁹Ag yon balut nilabay a nawalaan kayoy pakaamta tan lawas ag yo tinoluk so Katawan.

³⁰Ag yon balut dinengel so simbawak odino inasikasoy panametek ko.

³¹Lapud saya, anien yoy bungay ginawa yo, tan deryaen kayo lamlamang na dilin kagagawa yo.

³²Ompapatey iray totoon anggapoy salsalid panagbilay lapud ipopolisay day kakabatan. Nadederal iray totoon makulang-kulang lapud ag ira mangasasikaso.

³³Balet niarawid kaatapan so siopaman ya ondengel ed siak. Mareen so pambilay to, ta anggapoy nepeg ton takotan.