Read Pangasinan SARAY PROBIRBIO 10 Bible Online

SARAY PROBIRBIO 10 - Pangasinan bible

SARAY PROBIRBIO 10

¹"Sikara yay probirbio nen Solomon: Paliketen na makabat ya anak so ama to; balet paermenen na makulang-kulang ya anak so ina to.

²"Anggapoy kaabigan ya iter ed sika na kayaryan a nalad saolan, balet say katonungan nipaliis to kad patey.

³"Ag iyabuloy na Katawan a naerasan iray totoon matonung, balet ag to iyabuloy a saray totoon maoges et naala ra so labay da.

⁴"Say ngiras pagmaliwen to kan mairap, balet say koli pagmaliwen to kan mayaman.

⁵"Makalakal so toon manggapas no panaon na panagani; balet makapabaing so toon manogip no panaon na panagani.

⁶"Awaten na toon matonung iray bindision. Saray salita na toon maoges iyaamut toy maruksan inkatoo to.

⁷"Nanunotan a sakey a bindision so toon matonung, balet nalingwanan a tampol so toon maoges.

⁸"Awaten na totoon makalakal iray maung a simbawa. Naderal iray totoon mansasalitay maoges.

⁹"Arawid kaatapan iray totoon maptek so panagbilay da, balet naerel iray totoon pikewet so panagbilay da.

¹⁰Mangiiter na golo so toon iyaamut toy katwaan, balet mankikimey para kareenan so toon mangibabagay kakulangan.

¹¹Saray salita na toon matunong et sobul na bilay, balet saray salita na toon maoges iyaamut day maruksan inkatoo.

¹²Say bosul manangigapoy golo, balet say aro manamaandiy amin a kasalanan.

¹³Makabaliksan iray salitaen na toon makabat, balet nepeg a nadusa iray makulang-kulang.

¹⁴Saray totoon makabat gagawaen day anggaay nayarian da ya arumay pakaamta, balet no saray makulang-kulang so mansalita, asingsingger a golo lay niwala.

¹⁵Say mayaman a too iyaagel na kayamanan to; say toon mairap-bilay dederalen na kairapay bilay to.

¹⁶Bilay so tumang na panggaway katonungan, balet kasalanan so bungay panggaway kasalanan.

¹⁷Mambilay iray totoon ondengel no pepeteken ira, balet walad kaatapan iray totoon ag da birbiren so kalilingo ra.

¹⁸Matila so toon iyaamut toy panagbosul to. Makulang-kulang so toon managtalabutob.

¹⁹Mainomay a makapankasalanan so toon malabir. Makabat so toon madangka ed panagsalita.

²⁰Singa puron pilak iray salita na toon matonung; andi-kakanaan so kanunotan na toon maoges.

²¹Pankaabigan na amayamay a totoo iray salita na toon matonung, balet nayarin pateyen moy sikan dili lapud inkakulang-kulang.

²²Say bindision na Katawan so mamapayaman ed sika. Say pinasyan kimey ag to ka napayaman.

²³Panliketan na toon makulang-kulang so panggaway kaogsan, balet panliketan na toon walay pakatalus so kakabatan.

²⁴Nagamuran na saray totoon matonung so pilalek da, balet onsabid saray totoon maoges so tatakotan da.

²⁵Naandipat iray totoon maoges no ondalan so bagyo, balet lawas arawid kaatapan iray totoon matonung.

²⁶Ag mo igaganggan so toon mangiras; aliling to labat so bengatlan makakilem ed ngipen mo odino asewek ed matam.

²⁷Makaparokey na bilay so pangigalang ed Katawan. Saray totoon maoges ompatey ira kasakbayay panaon da.

²⁸Gayaga so pansumpalan na saray ilalo na totoon matonung, balet andi-kabaliksan so pansumpalan na saray ilalo da ray totoon maoges.

²⁹Iyaagel na Katawan iray totoon maptek so panagbilay da, balet dederalen to ray totoon kaogsan so gagawaen da.

³⁰Arawi lawas ed kaatapan iray totoon matonung, balet ag makapansiansian manayam ed dalin iray totoon maoges.

³¹Kakabatan so sasalitaen da ray totoon matonung, balet napatondan mansalita iray dilan maoges so sasalitaen da.

³²Saray totoon matonung amta ray salitan marakep ya ibalikas, balet saray totoon maoges ansakit a salita so lawas ibabalikas da.