Read Pangasinan SARAY PROBIRBIO 13 Bible Online

SARAY PROBIRBIO 13 - Pangasinan bible

SARAY PROBIRBIO 13

¹"Say anak a makabat dedengelen toy bilin na ama to, balet say toon mapaatagey ag ton balut birbiren a sikatoy nalilingo.

²"Natumangan iray maung a totoo lapud saray ibabalikas da, balet say aanapen na saray managpalikdon totoo et say panggawa ray duksa.

³"Alwaran moy panagsalitam, pian niagel moy bilay mo. Say toon anggapoy adyad panagsalita dederalen toy sikaton dili.

⁴"Say toon mangiras ag to nagamuray pampipilalekan to, balet say makoli nagamuran toy amin a labay to.

⁵"Kabosul na toon matonung iray tila, balet mabambanday tan makapapelag ed kababaingan iray salita da ray totoon maoges.

⁶"Say inkatonung iyaagel to ray anggapoy kasalanan, balet say kaogsan dederalen to ray managkasalanan.

⁷"Wala ray totoon mankonkonwarin mayaman, anta anggapo ra. Saray arum mankonkonwarin mairap-bilay ira, anta mayamyaman ira.

⁸"Say toon mayaman nakaukolan ya ikana toy kuarta to a pangyagel tod bilay to, balet say toon mairap-bilay anggapoy manataktakot ed sikato.

⁹"Saray totoon matonung aliling day silew a marmarlang; saray totoon maoges aliling day makuykuyep a lamparaan.

¹⁰Say panagpaatagey panlalapwan na gunigon. Magmaung niy onkerew na simbawa.

¹¹Mainomay a nabalang so kayamanan ya ag nansagputan, balet naaruman lan naaruman no nansagputan.

¹²Say ilalon mabayag ya aalagden pakakapoyen toy liknaan, balet say pilalek ya agamuran pagagayagaen to ka.

¹³No ipolisay moy maung a simbawa kekerewen moy gunigon, onur mo et arawi kad kaatapan.

¹⁴Sobul na bilay iray bangat da ray totoon makabat; ibaan da kan ompaliis no wala kad kaatapay patey.

¹⁵Kagalangan so iiter na pangikanay olo, balet mamapaarap ed deral iray totoon ag napanmatalkan.

¹⁶Saray totoon walay pakatalus mannunot ira kasakbayan a walay gawaen da, balet saray totoon makulang-kulang ibabawag day inkakulang-kulang da.

¹⁷Panlalapwan na gunigon iray manangibalitan ag napanmatalkan, balet kareenan so iiter da ray napampiaan.

¹⁸Magmaliw a mairap-bilay tan napelag ed kababaingan so toon ag onderengel ed bilin. Napapagalangan so toon ontotoluk ed panametek.

¹⁹Agaylay gayagay pusom no nagamuran moy pilalek mo! Saray totoon makulang-kulang ag da labay ya ikbanay kaogsan.

²⁰Miolup kad saray makabat et magmaliw kan makabat. No mikaarod kad saray makulang-kulang naderal ka.

²¹Tombutombuk ed anggan iner so gunigon ed saray makasalanan, balet natumangan na saray maung a bengatla iray matonung.

²²Say maung a too walay kayamanan ton ipatawir ed saray apo to, balet say kayamanan na saray makasalanan onlad saray matonung.

²³Saray ag nadadalusan a kaalogan nayarin napananian na daakan a kakanen ya onkanad saray mairap-bilay, balet saray totoon maoges isesebel da ran nadalusan.

²⁴No ag mo dusaen so anak mo ag mo inaro. No inarom, peteken mo.

²⁵Malaem so kakanen na saray totoon matonung, balet kulang lawas so kakanen da ray totoon maoges.