Read Pangasinan SARAY PROBIRBIO 16 Bible Online

SARAY PROBIRBIO 16 - Pangasinan bible

SARAY PROBIRBIO 16

¹"Nayarin mamplano tayo, balet say Dios so makaoley ed pakasumpal da.

²"Nayarin abaloan mo a maptek ya amin so gagawaen mo, balet say Katawan sisintinsiaan to ray gagalam.

³"Kerew mod Katawan a bindisionan to ray planom, et nagawam ira.

⁴"Amin a ginawa na Katawan walay pansumpalan da; et saray totoon maoges deral so kasumpalan da.

⁵"Kabosul na Katawan ya amin iray mapaatagey; ag to abuloyan a paliisan day dusa.

⁶"Magmaliw kan matoor tan maonur, et pirdonaen na Dios so kasalanan mo. Pagalangan moy Katawan, et anggapoy maoges a nagawad sika.

⁷"No makapaliket kad Katawan, napagmaliw mon kakaarom iray kalaban mo.

⁸"Magmaung niy daiset a kayaryan a nalad malinis ya anapan, nen say dakerakel a kayaryan a nalad kasaolan.

⁹"Nayarin mamplano ka, balet say Katawan so mangiwawanwan ed saray gawam.

¹⁰Mansasalitan walay pakayari na Dios ed sikato so ari; maptek lawas iray iiter ton sintinsia.

¹¹Labay na Katawan a saray simbangan tan sukatan et anggapoy kasaolan tan anggapoy tilaan ed panaglako.

¹²Ag nepeg ya abuloyan na saray arari so panggawa na kaogsan, ta say inkatonung so mamapabiskeg ed pakaoley.

¹³Labay a dengelen na ari so katwaan, tan aroen to ray mansasalita na katwaan.

¹⁴Say toon makabat gawaen toy anggaay nayarian ton paliketen lawas so ari; no mampasnuk so ari, nayarin walay toon ompatey.

¹⁵Say maung a linawa na ari et singa lorem a mangipepelag na oran no tiagewwadman so bilay.

¹⁶Maung nin amimpiga so nawalaan na kakabatan tan pakaamta nen say nawalaan na balituk tan pilak.

¹⁷Dalan ya anggapoy kaogsan so pankukurangan da ray totoon maung a totoo; kanyan nengneng moy lalaen mo, ta nayarin ilaban toy bilay mo.

¹⁸Say panagpaatagey mansusumpal ed kaderal, tan say panaglastug, diad katumba.

¹⁹Magmaung niy toon mapaabeba tan mairap-bilay nen say sakey ed saray mapaatagey tan miaapag ed saray asamsam da.

²⁰Dengel moy nibabangat ed sika, et onaligwas ka; manmatalek kad Katawan, et manliket ka.

²¹Amta so toon makabat lapud pakatalus to. No lalon marakep iray salita to, sikatoy lalon makaayayat.

²²Say kakabatan sakey a sobul na bilay na saray makabat; balet darak na panaon labat so pangibangat ed saray totoon makulang-kulang.

²³Saray totoon makabat mannununot ira kasakbayan a mansalita ra; say ibaga rad satan et lalon makaayat.

²⁴Saray marakep a salita et singa ra dilomasamit tan maabig ed laman mo.

²⁵Say dalan ya abaloan mon duga et nayarin mamaarap ed patey.

²⁶Lapud siba na kumikimey lalon mankokoli, ta labay ton ekaley eras to.

²⁷Saray totoon maoges manaanap ira na pamasakit dad arum a totoo; anggan saray salita ra manliub ya apoy.

²⁸Saray totoon maoges so mangikakayat na talabutob; manangigapo ray golo tan managderal iray pankakaaro.

²⁹Saray totoon maruksa papalikdoen da ray kakaaro ra tan iwawanwan da rad deral.

³⁰Manalwar kad saray totoon mankindat tan manimimis ed sika; walay nunot dan maoges a gawaen.

³¹Say andokey a bilay et sikatoy tumang na saray totoon matonung; mapagalang a korona so ampotin buek.

³²Magmaung niy toon maanos nen say toon makapanyari. Magmaung niy toon dadangkaan toy sikaton dili nen say toon ooleyan toy intiron siudad.

³³Saray totoo pampapalaranan dan amtaen so linaway Dios, balet say Dios a dili so mangiiter na ebat.