Read Pangasinan SARAY PROBIRBIO 19 Bible Online

SARAY PROBIRBIO 19 - Pangasinan bible

SARAY PROBIRBIO 19

¹"Magmaung niy toon mairap-bilay a maptek so panagbilay to nen say toon matila tan makulang-kulang.

²"Aliwan maung so sagpasagpa ya anggapoy amta; say ag pakaanos pansumpalen to ka ed gunigon.

³"Wala ray totoon nadederal lapud inkakulang-kulang da, insan da tetetelen so Katawan.

⁴"Saray mayaman a totoo amayamay lawas so nakakaaro ra, balet saray mairap-bilay tataynan na anggan saray pigaran kakaaro ra.

⁵"No mantila ka ed korti andi-saew a nadusa kaag ka makapaliis.

⁶"Labay na balang sakey so mangala na abig-linawa na toon atagey so kipapasen; ipapasen na balang sakey a kaaro to iray totoon mangiiter na abig-linawa.

⁷"Say mairap-bilay a too bobosulen na anggan saray agagi to; ag pankelawan ya anggapoy kakaaro to. Anggan antoy gawaen to anggapoy nakaaro to.

⁸"Panggawaan moy sikan dili na kamaungan tan manaral ka na anggaay nayarian mo; insan ag mo lilingwanan iray naaralan mo, et onaligwas ka.

⁹"Anggapoy toon mantitila ed korti a napaliisan toy dusa; asintinsiaan lan ompatey.

¹⁰Aliwan manepeg a mambilay a mayaman so toon makulang-kulang, tan aliwan manepeg a manoley ed saray opisyal so aripen.

¹¹No ikanam so olom pokpokan moy pasnuk mo. No nanggawad sika na makapoy so kaparam a too, kagalangan mo no palabasen mo.

¹²Say pasnuk na sakey ya ari et singa nguam na lion, balet say maung a linawa to et singa oran a pampipilalekan.

¹³Say makulang-kulang ya anak nayarin deralen toy ama to. Say makolkol ya asawan bii et singa ag manondan panterterter na danum.

¹⁴Say sakey a laki nayarin natawir tod atateng to so abung tan kuarta, balet say Katawan labat so makaiter ed sikato na makalakal ya asawa.

¹⁵Sigi labat, manggiras ka; ogip ka labat, balet naerasan ka.

¹⁶Toluk mo ray ganggan na Dios et mambilay kay andokey; no paolyan mo ra, ompatey ka.

¹⁷No mangiter kad saray mairap-bilay singa papautangen moy Katawan, et say Katawan so mambayar ed sika.

¹⁸Petek mo ray anak mo no ogogaw ni ra, legan a nayarian da niy ibangat. No andi, tutulongan mo ran maneral ed sikaran dili.

¹⁹No mapetang so olo na sakey a too, paolyan mod pansumpalan to. No agwaten mon maminsan ed gunigon, nakaukolan a gawaen mo lamet.

²⁰No ondengel kad saray simbawa tan maabuloy kan manaral, magmaliw kan makabat.

²¹Nayarin mamplano na amin a bengatla iray totoo, balet say linawa na Katawan so nasumpal.

²²Kapepelag ed kababaingan so inkaagom; magmaung ni ray totoon mairap-bilay nen saray totoon matila.

²³Pagalangan moy Katawan, ed nawalaan kay andokey a bilay, apenek, tan arawid kaatapan.

²⁴Wala ray totoo a diad gaway ngiras da, ag da nisubo so kanen da.

²⁵Nepeg a dusaen so inkalastug, pian makaaral iray anggapoy amta. No makabat ka, makaaral ka no napetek ka.

²⁶Say too labat a makapabaing tan makapaingungot so manduksad ama to tan mamataynan ed ina to.

²⁷Anak ko, no tondaan moy manaral, nalingwanan mo la ray inaral mo.

²⁸Anggapoy katunongan no say tasi et walay labay ton pasakitan. Saray totoon maoges labalabay day taway na kaogsan.

²⁹Andi-saew a nabakbak iray mapaatagey a makulang-kulang.