Read Pangasinan SARAY PROBIRBIO 2 Bible Online

SARAY PROBIRBIO 2 - Pangasinan bible

SARAY PROBIRBIO 2

¹"Anak ko, aral moy ibabangat kod sika tan ag mo lilingwanay pagagawak ed sika.

²"Dengel kad kakabatan tan apiger mon talusan.

³"Kerew ka na pakaamta; ibagam so pankaukolan mo na kakabatan.

⁴"Panseetan mon anapen a singa pananap mod pilak odino arum a niamut a kayamanan.

⁵"No onyay gawaen mo, nakabatan mo no antoy kabaliksan na itakot ed Katawan, tan naamtaan mo so nipaakar ed Dios.

⁶"Say Katawan so mangiiter na kakabatan; manlalapud sikato so pakaamta tan pakatalus.

⁷"Tutulongan tan iyaagel to so matonung, tan iyaagel tod kaatapan iray maptek so panagbilay da.

⁸"Iyaagel tod kaatapan iray matonung so pipiolup dad kapara ran too, tan aantabayen to ray matoor ed sikato.

⁹"No dengelen mo ak, naamtaan mo no antoy maptek, matonung, tan matwa. Naamtaan mo no antoy nepeg mon gawaen.

¹⁰Magmaliw kan makabat, tan paliketen ka na pakaamtam.

¹¹Iyagel ka na kakabatan tan pakatalus mo,

¹²tan ipaliis da kad pakagawam na kaogsan. Iyarawi da kad saray totoon manangiter na gunigon lapud panagsalita ra

¹³saray totoon inkaindan day matonung a panagbilay, ta kinaliktan day bilonget na kasalanan,

¹⁴saray totoon panliliketan day panggaway kabandayan tan panggagayagaan ed andi-kakanaan so kaogsan,

¹⁵saray totoon pikewet so panagbilay da tan ag ira napanmatalkan.

¹⁶Nayarian mon iyarawian so marotak a biin ayaten to kad malamlamuyot a panagsalita to,

¹⁷aliwan matoor ed asawa ton dili, tan dineral to ray masanton sipan to.

¹⁸No onla kad abung to, patey so arapen mo. Manasingger kad sangab na lobuk no onla kad man.

¹⁹Siopamay ombisitad sikato et ag la makapawil; ag to la natonton so dalan a mamaarap ed bilay.

²⁰Kanyan nepeg mon aligen so kabibilay na saray maung a totoo tan mambilay kan matonung.

²¹Saray matonung a totoosaray maptek so panagbilay daet manayam irad sayan dalin tayo.

²²Balet say Dios paandipaten tod dalin iray totoon maoges, tan baguten to ray makasalanan a singa pamagut na tanaman ed dalin.