Read Pangasinan SARAY PROBIRBIO 28 Bible Online

SARAY PROBIRBIO 28 - Pangasinan bible

SARAY PROBIRBIO 28

¹"Ombabatik iray totoon maoges anggaman ya anggapoy onoosil ed sikara, balet saray totoon maptek so panagbilay da masebeg ira a singa lion.

²"No makasalanan iray totood bansa, mansasalat iray pangulo to. Balet mansiansian mabiskeg so sakey a bansa no wala ray maotek tan ikakana ray olo ran pangulo to.

³"Say toon walad pakaoley a mamapairap ed saray totoon mairap-bilay, et singa makmaksil ya oran a mandederal ed saray tanaman.

⁴"No ag mo onuren so ganggan migagampi kad saray totoon maoges, balet no onuren mo kalaban mo ra.

⁵"Saray totoon maoges ag da amta so kabaliksan na inkatonung, balet saray mangigagalang ed Katawan sigput dan natatalusan.

⁶"Magmaung niy toon mairap-bilay a maptek so kabibilay to nen say mayaman a maoges so kabibilay to.

⁷"Makabat so anak a laki ya oonuren toy ganggan, balet say mikakaarod saray andi-kakanaan a totoo ipepelag tod kababaingan so ama to.

⁸"No minmayaman ka lapud alablabas a panagpaabang moy kuartam tan diad panaganamut moy pankanawnawam ed saray totoo, onla ed toon mapangasid mairap-bilay so kayamanan mo.

⁹"No ag mo oonuren so ganggan, kabosul na Dios a dengelen so pikakasim.

¹⁰No palikdoen mon manggaway kaogsan so toon maptek, napelag kad dilin patit mo. Say toon anggapod sikatoy pakabalawan natumangan na amayamay a kaabigan.

¹¹Saray totoon mayaman ipapasen day sikaran dili a makabat, balet dakel niy amta na toon mairap-bilay a walay pakatalus.

¹²No say toon matonung so nakawesay pakayari manliket iray katoowan, balet no say toon maoges so manoley, kiamut-amut iray totoo.

¹³Ag ka onaligwas ed bilay no iyamut mo ray kasalanan mo, balet no ipatwam ira tan ibeneg mo la ra, kasian ka na Dios.

¹⁴Toluk mo lawas so Katawan, et magmaliw kan maliket. No anawet so olom naderal ka.

¹⁵Pakaskasi ray mairap-bilay ed silong na maoges a manoley; aliling toy mangwam a lion odino liber-liber ya aso.

¹⁶Say manoley ya ag to ikakanay olo to et magmaliw a maruksan managpairap, balet say manoley a kabosul toy panagsaol et andokey so panoley to.

¹⁷Say toon akapatey na kapara ton too et gaganatan ton kotkotan so dilin lobuk to. Ag mo babanoen.

¹⁸Mambilay kan maptek, et arawi kad kaatapan. No pikewet so panagbilay mo, bigla kan napelag.

¹⁹Say makolin dumaralus walay daakan a kakanen to. Mairap lawas so bilay na saray totoon managdarak na panaon.

²⁰Saray totoon maptek mambilay ira a nagnap so liket da. No maganat kan onyaman nadusa ka.

²¹Makapoy so panintinsia a walay kikilingan. Balet wala ray huis a manggaway makapoy lapud pangala ray anggan melmelag a pasoksok.

²²Saray totoon masiblet maganat ira ya onyaman, kanyan ag da amta no ngalngali la onirap so bilay da.

²³Petek moy sakey a too, et ag mabayag labay to niy impametek mo nen say panamalikdo.

²⁴Siopamay mannununot ya aliwan kasalanan so pantakew ed saray ateng et anggapoy pidomaan tod saray peteg a matakew a totoo.

²⁵Golo labat so igagapo na inkasiblet. Magmaung niy kipapasen mo no manmatalek kad Katawan.

²⁶Inkakulang-kulang so panmatalek ed dilin pakatalus mo. Arawian moy kaatapan, tan tombuk mo ray bangat na saray totoon lalon makabat.

²⁷Mangiter kad saray mairap-bilay et ag ka lan balut naandian na nakaukolan. No ikopit moy matam ed saray mairap-bilay, amayamay so mangisambad sika.

²⁸Kiamut-amut iray totoo no walad pakayari iray maoges a totoo. Balet no naandi la rad pakayari, saray matonung a totoo lamet so manoley.