Read Pangasinan SARAY PROBIRBIO 29 Bible Online

SARAY PROBIRBIO 29 - Pangasinan bible

SARAY PROBIRBIO 29

¹"No paaweten moy olom kapag sikay pepeteken, onsabiy agew a sikay biglan naderal tan anggaan mo la.

²"Ipanengneng mod siak so matonung a manoley, et ipanengneng kod sika iray totoon maliket. Ipanengneng mod siak so maoges a manoley, et ipanengneng kod sika iray totoon pangaskasiyay kipapasen da.

³"No pablien moy kakabatan ikinon ka na amam. Andi-kakanaan a panagdarak so panggastos ed saray bibiin marotak.

⁴"Mabiskeg so bansa no say inkatonung so ipakurang na ari, balet no say kuarta labat so kawalaay pilalek to, deralen toy bansa to.

⁵"No papalikdoen moy kaparam a too, papatitan moy sikan dili.

⁶"Naeerel na saray dilin kasalanan da iray totoon maoges, balet maliket tan bolus iray totoon matonung.

⁷"Say maung a too kabat to ray kanepegan da ray mairap-bilay, balet saray totoon maoges ag da natatalusan ira yan bengatla.

⁸"Saray totoon abebbebay panangipasen dad arum a totoo et nayarian dan gewgewen so intiron siudad. Saray totoon makabat papareenen day baley.

⁹"No irimanda na toon makabat so toon makulang-kulang, makapasnuk labat imay makulang-kulang, manelek-elek tan manggaway golo.

¹⁰Kabosul na saray managpatey na too so toon maptek so panagbilay to, balet saray matonung iyagel day bilay to.

¹¹Saray totoon makulang-kulang ag da iyaamut so pasnuk da, balet maanos tan napokpokan day pasnuk da iray totoon ikakana ray olo ra.

¹²No dengelen na manoley so tilan balita, magmaliw a matila ya amin iray opisyal to.

¹³Say toon mairap-bilay tan say toon managpairap walay pamparaan dainitdan iran dua na Katawan na saray mata.

¹⁴No iyagel na ari iray kanepegan na saray mairap-bilay, andokey a panaon so panoley to.

¹⁵Say lewet tan say pametek et maung so iter dad saray anak. No say labay na ogaw so nasumpal, ipelag tod kababaingan so ina to.

¹⁶No saray totoon maoges iray walad pakayari, ondakel so panaggaway kaogsan. Balet saray matonung naimatonan da so kapelag da ra yan totoo.

¹⁷Petek moy ogaw ya anak mo, et nikinon mo lawas. Anggapon balut so iter ton makasengeg na kababaingan mo.

¹⁸Say bansan anggapoy panangiwanwan na Dios et sakey a bansan anggapoy oksuy. Maliket so toon mangoonur na ganggay Dios!

¹⁹Ag napetek so aripen diad panamegley na salita labat. Nayarin natatalusan to ka, balet ag to ka dengelen.

²⁰Baleg niy ilalo na sakey a toon makulang-kulang nen say toon ag to nununotey lalabiren to.

²¹No iter moy amin a labay na aripen mo manlapud ogaw ni, onsabiy agew a panoleyan toy amin a kayaryan mo.

²²Say toon maipapasnuk panlapwan na dakel a kolkolan tan golo.

²³Say panagpaatagey mangipelag ed sika, balet no mapaabeba ka, napagalangan ka.

²⁴Say manonan kalaban na kaibay matakew et say sikaton dili. Nadusa no ibaga tod korti so katwaan, balet isamba na Dios no ag to ibagay katwaan.

²⁵Maatap so bilay mo no pibabalian mo so nununoten na saray totoon nipaakar ed sika, balet arawi kad kaatapan no manmatalek kad Katawan.

²⁶Balang sakey a too labay ton naala so abig-linawa na manoley, balet diad Katawan labat so pakagamuran moy katonungan.

²⁷Say toon matonung kabosul toy toon maoges, tan say toon maoges kabosul toy toon matonung.