Read Pangasinan SARAY PROBIRBIO 4 Bible Online

SARAY PROBIRBIO 4 - Pangasinan bible

SARAY PROBIRBIO 4

¹"Anak, dengel yoy ibabangat na ama yo. Asikaso yo, et nawalaan kayoy pakatalus.

²"Maung iray ibabangat ko, kanyan ag yo ra lilingwanan ya amin.

³"Nen ogaw ak nin melag, a bukbukor koy anak na saray ateng ko,

⁴"binabangatan ak nen amak. Inkuanda, Nunot mo ray ibabagak tan ag mo ra lilingwanan. Onur mo ray ganggan ko, et mambilay ka.

⁵"Anap mo so kakabatan tan say pakatalus! Ag mo lilingwanan o ipopolisay iray ibabagak.

⁶"Ag mo ikakaindan so kakabatan, et iyagel to ka; arom, et iyarawi to kad kaatapan.

⁷"Say sankamanonaan a nayarin gawaen mo et say pananap moy kakabatan. Gawam so anggaay nayarian mo a mananap na pakatalus.

⁸"Arom so kakabatan, et pagmaliwen to kan matalonggaring. Lakap mo, et itdan to kay kagalangan.

⁹"Say kakabatan so koronam a napnoy kagalangan.

¹⁰Dengel mo ak, anak ko. Ipapusom ya awaten iray salitak, et andokey so pambilay mo.

¹¹Imbangat kod sikay kakabatan tan inwanwan ta kad dalan na matonung a panagbilay.

¹²No manakar ka, anggapoy makasarad dalan mo tan no ombatik ka, ag ka nipatakba.

¹³Nunot mo lawas so naaral mo. Say aral mo sikatoy bilay mosimpitan mon maung.

¹⁴Ag ka oonla ed lalaen da ray totoon maoges odino aaligen so kagagawa ra.

¹⁵Ag mo gagawaen! Arawian moy antokaman a kaogsan! Ipolisay mo tan ituloy moy kurang mo.

¹⁶Ag makaogip iray totoon maoges no ag ni ra akapanggaway kaogsan. Ag ira makalirep no anggapo niy apasakitan dan too.

¹⁷Diad sikara say kaogsan tan karuksaan et singa kakanen tan iinomen.

¹⁸Say dalan a pankukurangan da ray totoon matonung et singa ombubutay ya agew ya onliliwawa lan onliliwawa ya anggad maliwliwawa la.

¹⁹Balet say dalan a pankukurangan da ray totoon maoges et ambilonget a singa labi. Natumba ra, ta ag da nanengneng so akapateran da.

²⁰Anak ko, dengel moy ibabagak. Talineng mo ray salitak.

²¹Ag mo aabuloyan a nalingwanan mo ra. Nudnunot mo ra tan yan mo rad pusom.

²²Itdan da na bilay tan abig-laman so siopaman a makatatalus ed sikara.

²³Alwaran moy panagnunot mo; say panagnunot mo so mangooksuy na bilay mo.

²⁴Ag kan balut mansasalita na aliwan tua. Ag ka mibabali ed palikdo.

²⁵Nengneng ka lawas a sitatalek ed lalaen mo; ag mo itetewek so olom diad kababaingan.

²⁶Iplanom a maung so gagawaen mo, pian maabig so pansumpalan na antokaman a gawaen mo.

²⁷Arawian moy kaogsan tan mankurang kan mapmaptek. Ag ka onsuasuawi na anggan sakey a kutdang ed maptek a dalan.