Read Pangasinan SARAY PROBIRBIO 5 Bible Online

SARAY PROBIRBIO 5 - Pangasinan bible

SARAY PROBIRBIO 5

¹"Anak ko, asikasom tan dengel mo ray kakabatan tan pakatalus ko.

²"Diad ontan naamtaan moy maabig a kagagawa, tan ipanengneng na panagsalitam a walay pakatalus mo.

³"Masamit a singa dilo so bibil na arum a laki tan malamuyot a singa larak na oliba so kakaangub to.

⁴"Balet kayariy pikaloguran mod sikato, kapaitan tan sulit labat so nasagmakan mo.

⁵"Iyakar to kad pasen a panaayaman da ray inaatey, ta mamapaarap ed patey so pankukurangan to.

⁶"Ag manaakar ed dalan a mamaarap ed bilay; onsuasuawid dalan, balet ag to nalilikas so nagagawa.

⁷"Dengel yo ak natan, sikayo ran anak, tan ag yon balut lilingwanan iray ibabagak.

⁸"Arawian yo yan bii! Ag kayo anggan onsisingger ed puirtay abung to!

⁹"No onyay gawaen yo, onlad arum a too so kagalangan a walad sikayo nen saman, tan wala ki nid kaksilan ya ompatey ed lima da ray anggapoy panangasin totoo.

¹⁰On, alaen na saray sangkaili so kayamanan yo, tan nakayaryan na arum iray nansagputan yo.

¹¹Manay-ay kayod pampanabus yo; kakatakatat tan kapokepokel so pansumpalan yo.

¹²Ikuan ed satan na sinansakey ed sikayo, Akin et ag ak balut akaaral? Akin et ag ko inabuloyan a peteken ak na siopaman?

¹³Ag ak dinmengel ed saray bumabangat ko. Ag ko ra inasikaso.

¹⁴Ag abayag, naplag ak ed kababaingan diad arap da ray katoowan.

¹⁵Nepeg a matoor kad asawam tan diad sikato labat so pangiteran moy panangarom.

¹⁶No wala ray anak mod paway anggapoy kaabigan a niiter dad sika.

¹⁷Nepeg a saray anak mo et ombaleg ira a sikay tulongan da, aliwan saray sangkaili.

¹⁸Kanyan manliket ka ed asawam tan anap moy gayaga ed biin kakasal mo.

¹⁹Say asawam et magana tan balibaliy kagagawa to a singa ulsa. Panliketen ka komun na ganggana to; nalingbu ka komun na aro to.

²⁰Anak ko, akin et iter moy panangarom ed arum a bii? Akin et labay mo niy ganggana na asaway arum a laki?

²¹Sankanengneng na Katawan ya amin iray gagawaen mo. Bambantayan to ka ed inermay laen mo.

²²Sakey a patit iray kasalanan na maoges a too. Naerel so maoges a too ed iket na dilin kasalanan to.

²³Ompatey lapud ag to nadangkaan so sikaton dili. Say ontan lan kinaambagel to so mangyakar ed sikato diad lobuk.