Read Pangasinan SARAY PROBIRBIO 7 Bible Online

SARAY PROBIRBIO 7 - Pangasinan bible

SARAY PROBIRBIO 7

¹"Anak ko, onur moy ibabagak tan ag mo lilingwanan iray ganggan ko.

²"Sumpal mo ray ganggan ko et mambilay ka. Asikasom ya onuren iray bangat ko a singa pangaasikasom ed saray matam.

³"Toluk mo lawas so bangat ko; isulat mod pusom.

⁴"Ipasen mo ya agim a bii so kakabatan, tan malet mon kaaro so pakatalus.

⁵"Iyarawi da kad bibiin asawa na arum a lalaki, tan diad bibiin marotak a makaayat iray salita ra.

⁶"Aminsan nen tinmandag ak ed bintana na abung ko,

⁷"anengneng ko ray amayamay a tobun-balon lalaki ya anggapo niy salsali rad panagbilay, balet walay naimanok a sakey a makulang-kulang.

⁸"Sikatoy manaakar ed dalan ya asingger ed sokung a panaayaman na sakey a bii. Ondadalan ed abay na samay abung na bii

⁹"nen labi ya ambilonget la.

¹⁰Insan inabet na samay bii ya akasolung na singa kawes na marotak a bii tan wala ray iplaplano ton gawaen.

¹¹Masebeg imay bii tan anggapoy baing to; akar-akar ed saray dalan

¹²odino manalalagey a manalagar ed inerman a sokung, no maminsan diad saray dalan, tan no arum diad tindaan.

¹³Nilakap to may tobun-balon laki, inanguban to, ninengneng tod mata, insan to inkuan,

¹⁴Angisaklang ak na saray bagat ko natan tan insempet koy karni ed saramay bagat ko.

¹⁵Kanyan pinmaway ak ta anapen ta ka; nampilalekan ta kan narumog et maung ta wadya ka manaya!

¹⁶Inapisan koy katrik na nankolor a linen a nanlapud Egipto.

¹⁷Pinabalingitan ko na mira, aloe, tan kanila.

¹⁸Gala, ta sanlabi tan duan manakdul. Manliket ta a manlakapan.

¹⁹Andid man so asawak. Mabayag ed nila ton pasen.

²⁰Dakel so inawit ton kuarta tan ag ompawil ya anggad duay simba.

²¹Atukso tod limgas to tan atanggoyur tod panamegley na malamlamuyot a panagsalita to.

²²Ag abayag akilad sikato imay laki a singa bakan tetengtengen ed panagpateyan, singa ulsan dawit-dawit lan naerel ed patit,

²³a pakapikaan tod puso. Singa manok ed tagey ya onloloob ed iket. Ag to amta a say bilay toy naala.

²⁴Natan, sikayo ran anak, dengel yo ak. Imano yoy ibagak.

²⁵Ag kayo patatangguyor ed onyan bii; ag kayo akar-akar a mananap ed sikato.

²⁶Sikatoy managderal na kagalangay amayamay a lalaki tan sikatoy makasengeg na impatey na ag la nabilang a totoo.

²⁷No onla kad abung to mamapaarap ka ed pasen a panaayaman da ray inaatey. Sikato yay antikey a dalan a mamaarap ed patey.