Read Pangasinan SAY KANTA NEN SOLOMON 1 Bible Online

SAY KANTA NEN SOLOMON 1 - Pangasinan bible

SAY KANTA NEN SOLOMON 1

¹"Saray sankarakepan a kanta nen Solomon.

²"Siak komun so angub-anguban mo na bibil mo; masamit nen say alak so panangarom.

³"Ambalbalingit ka, singa mansamiong a pabalingit so ngaran mo. Kanyan amin a marikit aroen da ka.

⁴"Ala mo ak, ta ombatik ita; sika so arik tan iyakar mo ak ed kuartom. Manliket itan dua, penepeneken tay sikaton dili ed panangaro a singa pampera na sakey a too ed alak. Ag pankelawan ya inaro ka na amin a bibii!

⁵"Bibiid Jerusalem, andeket ak balet maganggana ak, andeket ak a singa saray tulda ed Kedar, balet maganggana ak a singa kurtinad palasio nen Solomon.

⁶"Ag yo ak memelag-melagen lapud kolor na baog ko, lapud tinektek ak na agew. Akapasnuk ed siak nen saman iray agagik a lalaki, kanyan impankimey da ak ed kaubasan. Anggapoy oras kod saman a nanasikasod laman kon dili.

⁷"Ibagam ed siak, O inarok, Iner so pampakabkaban mod saray karnirom? Iner so pampainawaan da no kaagewan? Akin et anapen ta ka nid saray karniro da ray arum a pumapastol?

⁸"Ag mo amta no iner a pasen, O sika a sankagangganaan ed saray bibii? Laka, ta tombuk moy olup da ray karniro; mananap kay pankabkaban da ray kanding mo, diad abay da ray tulda na saray pumapastol.

⁹"O inarok, pagagalien mo ray lalaki o singa pamapagali na saray kabatyan ed kalakyan ya isisintad saray karwahi na Faraon.

¹⁰Agaylay dakep na buek mon manasakbung na lupam; singa ra alahas a mansaloyloy ed tenger mo.

¹¹Igawaan mi ka na pulsiras a balituk ya adikoraan na saray pilak.

¹²Nen mandokdokul so arik ed katri to samyong na pabalingit koy inmalingernger ed kaliber-liber.

¹³Ambalbalingit a singa mira so inarok legan ton akasaral ed pagew ko.

¹⁴Say inarok et singa saray balang a rosas ya ombubuskag ed kaubasan na En-gadi.

¹⁵Alay gangganam, O inarok; inmagayep iray matam!

¹⁶Agaylay inkaguapom, O pinablik; makapalikliket kan tua ed siak! Saray malambut a dika so dokulan ta;

¹⁷saray kiew a sidro so panoksulan na abung ta, tan tablan sipris so bobida.