Read Pangasinan SAY KANTA NEN SOLOMON 8 Bible Online

SAY KANTA NEN SOLOMON 8 - Pangasinan bible

SAY KANTA NEN SOLOMON 8

¹"Oy la komun a sakey kan agik a laki, ya inasikaso na inak ed pagew to. Diad satan, no naabet ta kad dalan, nayarian ta kan anguban, et anggapoy walad karaklan.

²"Iyakar ta kad abung nen inak, a dimay pangibangatan mod siak no antoy kabaliksan na panangaro. Itdan ta kay masamsamit ya alak, say alak kon ginawad bungay granada.

³"Danganan ko so kawigin taklay mo, tan poyuken ak na kawanan a limam.

⁴"Isipan yod siak, sikayon bibiid Jerusalem, ya ag yo kami sisigensigenen ed arowan min dua.

⁵"Siopa yay onsasabin manlalapud kalawakan, ya akatabin ed inaro to? Binangon ta kad silong na mansanas, diad pasen a nianakan mo.

⁶"Siak labat so arom; siak labat so lakap mo. Makapanyari tan mabiskeg a singa patey so aro. Onliuliub a singa pool.

⁷"Ag naerep na danum so aro; ag nalener na anggan anton delap. Balet no walay manali a saliwen to na kayamanan to so aro, bosul lalaingen so nagunggona to.

⁸"Walay agi min bii a katayatdang, tan kamoktil niy suso to. Antoy gawaen mid sikato no karawen na sakey a tobun-balo?

⁹"No komun ta sikatoy sakey a padir, ipaalageyan mi na pilak a tori. Balet no sikatoy sakey a puirta, paliberan mi na saray tablan sidro.

¹⁰Sakey ak a padir, tan saray susok so tori to. Amta na inarok a narumog kod sikato so inawa tan kareenan.

¹¹Si Solomon walay kaubasan to ed sakey a pasen a tatawagen na Baal-hamon. Wala ray dumaralus ya angabang ed sikato, balang sakey ed sikara nambayar na pilak a kuarta a sanlibo.

¹²Solomon, kayaryan mo la tay sanlibon pilak a kuarta, tan saray dumaralus kayaryan da lay duanlasus a pilak a kuarta. Wala met so kayaryan kon dili a kaubasan.

¹³Dengelen ko pay bosis mod tanamanan, O inarok; saray kakaarok et manaalagar iran ondengel ed sika.

¹⁴O Inarok, gala diad siak, ganatan mon singa korso, singa kalakyan a kilaw na ulsa ed kapalandeyan a tutuboan na tanaman a gagawaen a pabalingit.