Read Pangasinan SAY KAKABATAN NEN SOLOMON 1 Bible Online

SAY KAKABATAN NEN SOLOMON 1 - Pangasinan bible

SAY KAKABATAN NEN SOLOMON 1

¹"Aro yo so inkatonung, sikayo ran manoley ed mundo. Iyapasakey yon masimoon ed Katawan so kanunotan yo, tan anap yon matwa so Katawan.

²"Narumog na saray ag manusubok ed sikato; ipaamta toy sikaton dili ed saray manmamatalek ed sikato.

³"Saray totoo et isisian irad Dios na saray pikewet a kanunotan, tan no makulang-kulang itayon manubok ed sikato, say pakayari to ipelag to itayod kababaingan.

⁴"Ag balut manayam so Kakabatan ed siopaman a toon managpalikdo odino aripen na kasalanan.

⁵"Naaralan na siopaman a masanto so onarawi ed saray totoon managpalikdo. Ontaynan la no nibabalikas iray makulang-kulang a kanunotan; aliway liknaan to no nagagawa so ag inkatonung.

⁶"Say Kakabatan et sakey ya ispiritun makaaro ed saray totoo, balet ag to pirdonaen so siopaman a mansasalita na sumpad Dios, ta amta na Dios iray liknaan tan saray kanunotan tayo, tan narerengel toy balang salita tayo.

⁷"Bangta papanoen na ispiritu na Katawan so intiron mundo, tan pankakasakeyen ton amin iray walad mundo, amta to so balang salita ya ibabalikas na saray totoo.

⁸"Anggapoy toon mansasalita na maoges ya ag naimano na arum; ag mabayag awaten to so manepeg a dusa.

⁹"Nasalaysay a mapeget iray getma na totoon maoges; nidalem ed Katawan iray salita ra, insan naawat day dusan kanepegan na kaogsan da.

¹⁰Ag iyabuloy na Dios a walay onlaban ed sikato, tan bangta narerengel toy amin a bengatla, ag mo niamut ed sikato so panririklamom.

¹¹Kanyan ag ka onliliber a manririklamo, ta anggapoy nagawaan to yan kamaungan tan ag ka mansasalita na anagasang. Walay pansumpalan na saray sankaamutan a sasalitaen mo, tan deralen na panagtila so kamarerwam.

¹²Ag yo aanapen so dilin ipatey yo diad panamegley na saray gawan makasalanan.

¹³Ag pinalsa na Dios so patey, tan no ompatey iray mabilay a pinalsa, ag to pakaliketan.

¹⁴Pinalsa toy amin a bengatla pian mansiansia ran mambilay, tan maung tan marakep so amin a bengatlan pinalsa to. Anggapod sikara so makapatey a samal. Ag ooleyan na patey iyan mundo,

¹⁵ta ag ompatey so inkatonung na Dios.

¹⁶Saray totoon maoges et inawit dad sikaran dili so patey diad panamegley na saray bengatlan imbabaga tan ginagawa ra. Pampipilalekan day patey a singa pampipilalek ed sakey ya inaro. Akiambus irad patey, kanyan sikatoy kanepegan dan kaiba.