Read Pangasinan SAY KAKABATAN NEN SOLOMON 10 Bible Online

SAY KAKABATAN NEN SOLOMON 10 - Pangasinan bible

SAY KAKABATAN NEN SOLOMON 10

¹"Inyagel na Kakabatan so ama na mundo, say ononan toon minoli, nen bukor toy apalsa. Inyagel tod kasalanan a ginawa to

²"tan initdan to na biskeg a manoley ed amin a bengatlad dalin.

³"Balet walay toon aliwan matonung ya inkaindan toy Kakabatan; dineral toy sikaton dili, ta pinatey toy agi to lapud pasnuk to.

⁴"Lapud saman a kasalanan, adelap so mundo, balet inlaban lamet na Kakabatan. Inwanwan toy sakey a toon matonung diad panamegley na lopuk a kiew a baloto to.

⁵"Aminsan nen maermen iray bansa lapud ag atuloy iray maoges a plano ra, binirbir na Kakabatan so sakey a toon matonung tan impansiansia ton anggapoy kasalanan ed arap na Dios. Initdan toy biskeg ya ontoluk ed ganggan na Dios, anggaman ya inaro toy anak ton laki.

⁶"Inyagel na Kakabatan so sakey a toon matonung, legan ya ompapatey iray totoon maoges. Nibatikan na sayan too so apoy ya aneral ed saramay Limaran Siudad.

⁷"Nanengneng yo ni ray pakapaneknekan na kaogsan da. Kinmelang diman so dalin tan manasasewek. Mambubungad man iray kakiewan balet ag ira naluluto, tan manalalagey diman so lusek a pakanudnunotan ed sakey a toon ag anisia.

⁸"Impolisay na saray totood saraman a siudad so Kakabatan tan ag da napambiigay maung tan maoges. Aliwan satan labat; saray akeraan a deral-deral na saray siudad da et ipapanunot da nid sikatayo so makulangkulang ya impanbilay da, kanyan ag balut nalingwanan so nankulangan da.

⁹"Balet inyagel na Kakabatan ed kaatapan iray aripen to.

¹⁰Aminsan nepeg a paliisan na sakey a toon matonung so pasnuk na agi ton laki, et inwanwan na Kakabatan ed dugan dalan. Impanengneng tod sikato so panarian na Dios tan inabuloyan ton mangamta na saray masanton bengatla. Impagmaliw ton mapalabo tan maaligwas ed kimey to.

¹¹Nen inagoman na saray arum a totoo iray kayaryan to, tan labay dan alaen ed sikato, intalindeg na Kakabatan tan impagmaliw ton mayaman.

¹²Inyagel tod saray kalaban to a manaalagar na pankanawnawa ran ondogpad sikato. Impanalo to ed pinasyan laban, pian nabirbir to ya anggapoy lalon makapabiskeg ed too nen say panaglingkur ed Dios.

¹³Aminsan nilakon sakey ya aripen so sakey a toon matonung, balet ag inkaindan na Kakabatan. Inyarawi to ed kasalanan. Akilad sikato ed prisowan

¹⁴tan ag ton balut tinaynan ya anggad naitdan to na pakayari ed sakey ya impirio tan ginawa ton manoley ed totoon nampapairap ed sikato nen saman. Impaamta na Kakabatan a tila-tilay impangakusa rad sikato, tan initdan to na andi-anggaan a kagalangan.

¹⁵Aminsan inyagel na Kakabatan iray anggapoy kasalanan tan masanton totoo ed sakey a bansan managpairap iray totoo to.

¹⁶Linmoob so Kakabatan ed kamarerwa na sakey ed saray aripen na Dios tan tinalindegan to ray tatakotan ya arari diad panamegley na impanggagawa to na saray milagro.

¹⁷Tinumangan to ray totoo na Dios lapud saray kairapan da. Inwanwan to rad makapakelaw ya impanbiahi ra. Initdan to ray tarung no agew, tan maliwliwan sinag na saray bitewen no labi.

¹⁸Pinabeltang to rad aralem a danum na Dayat ya Ambalanga,

¹⁹balet impalner to ray kalaban da tan impaanor to ray bangkay da ed gilig na dayat.

²⁰Kanyan sinamsaman na saray totoon matonung iray totoon maoges. Nankanta ra na saray imno ed masanton ngaran mo, O Katawan; nankakasakey iran angidayew ed sika lapud inyagel mo ra.

²¹Initday Kakabatan iray emel na pakayarin mansalita; initdan to ni ingen iray ogogaw ya ankekelag na pakayarin malinew a mansalita.