Read Pangasinan SAY KAKABATAN NEN SOLOMON 11 Bible Online

SAY KAKABATAN NEN SOLOMON 11 - Pangasinan bible

SAY KAKABATAN NEN SOLOMON 11

¹"Inyakar na Kakabatan so aligwas ed saray totood Israel diad panamegley na sakey a masanton propita.

²"Bineltang day kalawakan ya anggapoy toon manaayam tan nankampo rad saray pasen ya ag nin balut nanayaman na saray totoo.

³"Binakal da ray kalaban da tan tinalo da ra.

⁴"Nen napgaan iray totoom, Katawan, tinmawag irad sika, et initdan mo ra na danum ya ontuturon manlapud putel a baton-dampay.

⁵"Saray desyang ya anusad saray Egipsio so angilaban ed saray totoom nen wala rad segsegang.

⁶"Lapud impaakseb na saraman a kalaban so ganggan a nepeg a pateyen iray ogogaw ya ankekelag, kinimbug moy panlalapwan na lawas a managagos ya ilog da tan ginawam ya ambanget lapud nilauk a dala. Diad kalawakan inabuloyan mon naapgaan iray totoom, pian natawayan da no panon so impanusam ed saray kalaban da. Insan nen ag da iilaloan, initdan mo ra na sawasawaan a danum.

⁹"Nen nasusubok ira, anggaman a maararo man a panametek, naaralan da no panoy inkairapan na saray totoon maoges nen sinintinsiaan mo rad pasnuk mo.

¹⁰Sinubok mo ray totoom, a singa panusubok na ama ed saray anak da, a pamasakbay ed sikara. Balet sinintinsiaan mon singa masebeg ya ari iray kalaban da tan dinusam ira.

¹¹Nanirap ira, asingger man odino arawi rad saray totoom.

¹²Adoblian so ermen da; nandageyem ira diad innengneng dad agawad imbeneg a panaon.

¹³Nen akabatan da a pankaabigan na saray totoom so inkadusa ra, abirbir dan gawam iman, Katawan.

¹⁴Impolisay na saray Egipsio imay too a nen ogaw nin melag et nibantak tan nikaindan ed paway; balet nen asumpal lan amiy bengatla; kinmelaw irad sikato. Ag balut napgaan iray totoon matonung a singa inkaapgaan da.

¹⁵Say kaogsan da et imbalang to rad makulang-kulang a kanunotan, kanyan angigalang irad saray oleg, tan saray arum a makarimdimlan ayayep, pinalsan ag da nayariay mannunot. Lapud saya, dinusam ira diad panamegley na impangibakim na nilaksan ayayep a singa saraya,

¹⁶tan binangatan mo ra a say dusa lapud kasalanan et miparad saman a kasalanan.

¹⁷Katawan, say andi-anggaan a pakapanyarim et pinalsa toy mundo manlapud matiryal ya anggapoy nengneng to. Nayarin mainomay mo komun a dinusa ira man a totoo diad panamegley na impangibakim na saray uso odino saray maruksan lion ya ondogpad sikara.

¹⁸Nayarin amalsa ka komun na saray balo tan makapataktakot ya ayayep, a nayarian dan iyingas so apoy odino ongwam tan mangipapaway na makapal ya asewek, odino mangipugso ray mata ra na saray makapataktakot a talagsik na apoy.

¹⁹Nayarin nanggawa ka komun na saray ayayep a singa saraya ya ag da la nakaukolan a pateyen ira man a totoo diad panamegley na idogpa ra, no ag ta nayarian da ran pateyen diad panamegley na inengneng da labat ed sikara.

²⁰Balet ag ya kinaukolan. Ayarian mo ra komun ya inosilan na inkatonung mo odino kinabil ira ya anggad ag da impatey, diad panamegley na sankamelagan ya aninoy pakayarim. Balet pinilim so panukat, pambilang, tan panimbang ed amin a bengatlan gagawaen mo.

²¹Nayarian mon ipanengneng so baleg a pakayarim diad kapiganman a labay mo, tan anggapoy toon makasumpad pakayarim.

²²Diad pakanengneng mo sakey a botil na buer so intiron mundo, a ngalngali ag to napagalaw so simbangan, sakey a terter na linaew ed dalin no kabwasan.

²³Diad pakapanyarim, nayarian mon gawaey antokaman, balet mapangasi ka ed balang sakey a too; papalabasen mo ray kasalanan mi tan iitdan mo kami na panaon a magbabawi.

²⁴Inarom so amin a bengatlan mambibilay; ag mo babalawen so antokaman a ginawam. No ag mo labay, ag mo la komun ginawa.

²⁵Panoy pakapansiansia na sakey a bengatla no ag mo labay? Panoy pakapambayag to, no ag mo pinalsa?

²⁶Inyabuloy mon mambilay, Katawan, lapud kayaryan mo, tan inarom so balang bengatlan mabilay.