Read Pangasinan SAY KAKABATAN NEN SOLOMON 13 Bible Online

SAY KAKABATAN NEN SOLOMON 13 - Pangasinan bible

SAY KAKABATAN NEN SOLOMON 13

¹"Makulang-kulang so toon ag to amtay Dios. Onnengneng ira yan totoo ed saray marakep a bengatla ed kaliber-liber da, et siansian ag da nanengneng so mabilay a Dios. Inaral da ray bengatlan ginawa to, balet ag da abirbir so nanggawad sikara.

²"Ingen, ipapasen dan saray diriyos a manooley ed mundo et say apoy, odino say dagem, odino say bagyo, odino saray onliliber a bitewen, odino say mapmaples a danum, odino saray mangatatawen a pinalsa.

³"Akaliket iray totoo ed karakep na sarayan bengatla, kanyan abaloan dan diriyos ira, balet nepeg ya abirbir da komun a walay amo na sarayan bengatla tan matalonggaring ni nen say dinanman ed sikara, ta sikatoy manamalsad dakep, tan pinalsa to ra.

⁴"Bangta mankelaw iray katoowan ed pakayari na sarayan bengatla, tan no panoy ikukurang da, nepeg a naaralan dad sikara a lalon makapanyari ni so nanggawad sikara.

⁵"No nabirbir tayon ontay lay kaawang tan karakep na mundon pinalsa, naaralan tayo met so nipaakar ed Manamalsa.

⁶"Nayarin alabas so inkapeget tayod sarayan totoo. Angangko, tuan nilabay dan anapen so Dios, balet ag da narumog.

⁷"Aliber ira na saray kimey na Dios, et lawas da ran nenengneng, ya anggad impakatanggoyur da a lapud marakerakep iray nanenengneng da, nepeg a diriyos ira.

⁸"Balet siansian anggapoy nibaraan da ra yan totoo.

⁹"No magenap so pakatalus dan mannunot nipaakar ed saray pinalsa diad sansinakuban, akin et ag dan balut nalmo so Katawan na amin a bengatla?

¹⁰Balet say sankapangaskasiyan a totoo et saray totoon isasaral day ilalo ra ed saray anggapoy bilay a bengatla, saray mangigagalang ed saray bengatlan ginawa na limay toosaray balituk tan pilak ya imahin da ray ayayep a balibaliy inkakorti ra, odino say andi-kakanaan a baton kinorti na sakey a too nen saman a panaon.

¹¹Nayarin mamatang na balibalin kiew so sakey a marunong a kumikimey na tabla, apiapigeren ton ekalan na obak, insane diad inkarunong to, manggawa na bengatlan walay kanaan to.

¹²Alaen to ray nakdaan a pirason kiew tan itongo ton panluto na kakanen a maliket ton dongoan.

¹³Balet diad saramay nakdaan a poter-poter na kiew, nayarin mangala na sakey a poter ya anggapoy kanaan to, a nayari nin pikewet tan napno na ponget. Diad oras iran anggapoy gawa to, apiapigeren ton kitikitan ya anggad makagawa na sakey a talintao na too,

¹⁴odino sakey ya andikakanaan ya ayep. Pintaan ton intiro na ambalanga, pian nasakuban ya amiy kakulangan to.

¹⁵Insan iparaan toy manepeg a pasen ed dingding a pangiliraan to tan ipeket to na balatyang a pasak.

¹⁶Asikasoen ton maung pian ag napelag, ta amta ton sakey labat a talintao tan nakaukolan toy tulong; ag to nayarian a tulongan so sikaton dili.

¹⁷Balet samay too et ag ambaing a pampikasian to yan anggapoy bilay a bengatla nipaakar ed kasal to, saray anak to, tan saray kayaryan to.

¹⁸Makapoy may talintao, balet kerewan to na abig na laman. Inatey, balet kerewan to na bilay. Anggapoy salsali tod bilay, balet kerewan to na tulong. Ag makaakar, balet kerewan to na maaligwas a biahi.

¹⁹Anggapoy pakayari na saray lima to, balet kerewan to na tulong nipaakar ed nigosio, pakakalmoy kuarta, tan kimey to.