Read Pangasinan SAY KAKABATAN NEN SOLOMON 14 Bible Online

SAY KAKABATAN NEN SOLOMON 14 - Pangasinan bible

SAY KAKABATAN NEN SOLOMON 14

¹"Ontan met, say sakey a toon mampaparaan a mambiahid madaluyon a dayat et onkerew na tulong ed sakey a poter na kiew ya aliwan mabiskeg a singa say bapor a magano to lan loganan.

²"Walay toon namplano no panoy pakagawa na samay bapor, lapud pilalek ton pakalmoay kuarta, tan balibaliy impanggawa na sakey a toon marunong.

³"Balet say panangasikasom, O Ama, so mangiwawanwan ed samay bapor; iitdan mo na dalan ya arawid kaatapan diad ibaliw tod saray daluyon na dayat.

⁴"Nayarin onlad dayat iray totoo anggan anggapoy dunong dan mambaroy, lapud nayarian mo ran ilaban ed antokaman a kaatapan.

⁵"Linawam a nepeg ya ikana iray bengatlan ginawam diad panamegley na kakabatan mo. Kanyan nayarin baliwen na saray totoo so dayat diad panamegley na sakey a baloto tan onsakbit iran anggapoy agawa, lapud imamatalek day bilay da ed samay melag a kiew.

⁶"Onyay agawa nen saman a panaon, nen nanaandi so mapasirayew a poli na saray alan. Akabatik so toon ilalo na mundo diad panamegley na ontan a baloto diad panangiwanwan mo tan intilakan toy mundo na balon kailalakan a mangituloy na poliy katoowan.

⁷"Walay sakey a bindision ed samay kiew a baloto nen Noe ya angyabuloy a mansiansia so inkatonung,

⁸"balet walay sakey a samba ed talintaon ginawa na limay too. Wala met so sakey a samba ed samay manggagawa, lapud kikimeyen to yan manganggan bengatla, insan to tinawag a sakey a dios.

⁹"Namparan kabosul na Dios iray totoon maoges tan sarayan maoges a bengatla.

¹⁰Dusaen na Dios iray bengatlan agawa tan saray totoon nanggawa.

¹¹Kanyan ompelag ed saray paganon talintaoy diriyos so sintinsia na Dios, lapud anggaman ya agawa rad bengatlan pinalsa na Dios, nagmaliw iran makapataktakot a bengatlan mang kalut na saray kamarerwa da ray makulang-kulang a totoo.

¹²Ginmapo so inmoralidad nen agawa iray talintaloy diriyos. Dineral day bilay na too, nanlapu lad samay inmonan inkagawa ra.

¹³Aliwan wala lawas iray talintaoy diriyos, tan ag ira mansiansian anggad angga.

¹⁴Say panagpaatagey na too so makasengeg na inkiwala ra diad mundo, kanyan niplano so masiglat a pansamput da.

¹⁵Aminsan, walay sakey ya ama a mapalaloy inkaermenan to lapud ag inilaloan ya impatey na anak to, kanyan inggawaan to na talintao imay ogaw a biglan naandid sikato. Insan pinagalangan to a sakey a dios so sakey ya inatey a too, tan imbangat tod saray walad silong na pakaoley to iray maamut a sirimonya.

¹⁶Diad panaakar na panaon, nagmaliw a lalon malet yan maoges a kaogaliyan. Diad kaonuran, nagmaliw a ganggan tan nigagalang iray talintaoy diriyos, lapud ganggan da ray makapanyarin manoley.

¹⁷No manaayam ed arawdawin pasen iray totoo, et ag da nayarian a pagalangan so sakey ya ari ed arap to, balet et labay dan pagalangan, nudnunoten day nipaakar ed indengan to, insan da igawaan na talintaon isisipan dan kaparpara to.

¹⁸Saray atagey so pilalek dan managkorti a nanggawad sarayan talintao et sikaray angikayat na sayan panangigalang, anggan diad saray totoon ag da amta imay ari.

¹⁹Nayarin labay na sakey a managkorti a paliketen so sakey ya ari, kanyan ikana toy karunongan to a manggawa na talintaon maung niy nengneng to nen say samay dilin too.

²⁰Insan mapalaloy kaayat na saray totoo ed kimey na samay managkorti, kanyan samay pinagalangan dan too nen saman et nagmaliw a diodiosen da natan.

²¹Nagmaliw ya makapatey a patit, lapud saray totoon maneermen, odino walad silong na pakaoley na ari, et mangala ra na saray bengatlan bato odino kiew, insan da itday galang a para labat samay Sakey a Dios.

²²Anggapoy tonda na sayan inkagawa. Kulang so inkalingo ray totoo nipaakar ed pakaamtad Dios. Nambilay irad andi-tondan maoges a bakal, balet diad ag da impangikanay olo ra, tinawag dan kareenan.

²³Pinapatey da ray ogogaw no wala ray awaten dan balon kabyangan na panangigalang da, nansisilibra ra na saray maamut a mistirio, tan nanggagawa ray sirimonyan katekep toy magolon panliliketan tan kagagawan sumpad inkatoo.

²⁴Dinodotakan day bilay da tan say kasal da. Nayarin pateyen na sakey a laki so sananey a laki diad liputan odino paermenen to diad pikalugoran tod asawa na samay sananey a laki.

²⁵Diad inerman a pasen, walay pateyan, takewan, palikdowan, deralan, traidoran, golowan, tilaan,

²⁶panagtaktakot ed saray totoon anggapoy kasalanan, anggapoy panamirbir na maung a linawa, maoges ya ogali, aliwan panangikanad liket na laman, pansisian na sanaasawa, pikakaloguran, tan inmoralidad.

²⁷Say panangigalang ed saray talintaoy diriyos, a nepeg ya ag balut bitlaen iray kangaranan da, et sikatoy gapo tan samput, pansengegan tan pansumpalan na amin a kaogsan.

²⁸Saray totoon mangigagalang ed saraya et nanaandi so panagadya rad sikaran dili odino ipapasen dan propisiya iray tila, odino mambibilay irad kaogsan, odino mainomay dan ag tooren so salita ra.

²⁹Mantitila ra a katekep na samba tan ag da iilaloan a nadusa ra, lapud anggapoy bilay iray talintaoy diriyos a panmamatalkan da.

³⁰Balet diad kaonuran naabotan met lamlamang ira na dusa, lapud duaran makasengeg: onona, alingo ra nipaakar ed Dios nen inggalang da ray talintaoy diriyos, tan kumadwa, melmelag so panamabli rad inkasanto, kanyan nantitila ra a pamalikdo rad saray totoo.

³¹No mankasalanan iray totoon aliwan matonung, anapen ira na dusan kanepegan na saray makasalanan, aliwan say pakayari na bengatlan nansambaan da.