Read Pangasinan SAY KAKABATAN NEN SOLOMON 15 Bible Online

SAY KAKABATAN NEN SOLOMON 15 - Pangasinan bible

SAY KAKABATAN NEN SOLOMON 15

¹"Balet sika, Dios mi, et mapangasi, matwa, tan maanos ka. Mapangasi so panooley mod sansinakuban.

²"Anggaman a mankasalanan kami, amta miy pakayarim tan kayaryan mo kami nin siansia. Balet lapud amta min kayaryan mo kami, ag kami mankasalanan.

³"Say pakaamtad sika et nagnap ya inkatonung. Say pamirbir ed pakayarim et gapowan na andi-anggan a bilay.

⁴"Ag kami imbalang na antokaman a maoges a ginaway karunongan na too, antokaman ya andi-kakanaan a pinintaan na sakey a managkorti, odino dinanman a talintaon apintaan na nandoroman kolor.

⁵"Say pakanengneng ed saratan a bengatla et liliingen toy liknaan na saray totoon makulang-kulang tan gagawaen to ran mampilalek ed sakey ya imahin ya inatey tan anggapoy bilay.

⁶"Siopamay manggawa na ontan a bengatla, odino pampilalekan to, odino pangigalangan to et aaroen toy bengatlan maoges, tan nagunggona toy kanepegan to no sikatoy paniilaloan to.

⁷"Say gumagaway banga et kikimeyan toy anlemek a pitek tan aapigeren ton gawaen a sakey a kagawaan ya ikana tayo. Maung so kikanaan na saray arum iran gagawaen to, tan anggapoy maung a kikanaan da ray arum, balet gagawaen to ran amin ed namparan dalin, tan nampara met so panaggawa tod sikara. Samay dilin gumagaway banga et sikatoy mannununot no antoy kikanaan na balang kagawaan a gagawaen to.

⁸"Sakey met a toon agano nin ginawad dalin, tan kalabas na maganon panaon, no nepeg to lan ipawil so kamarerwan nipabayes ed sikato, ompawil lamlamang ed dalin. Sakey a too, balet dadaraken toy kimey to diad panggagawa toy sakey ya andi-kakanaan a dios ya ikakana to met so dalin a panggagawaan toy banga.

⁹"Antikey so bilay to, tan ag mabayag et nepeg ya ompatey, balet anggapoy walad sikato tan. Labay toy mipaubayan ed saray managkimey na balituk, pilak, tan gansa, tan gagawaen to ray bengatla a singa panggagawa ra. Mapalaloy pangikikinon tod saray bengatlan gagawaen to, balet aliwa ran peteg.

¹⁰Dapul so puso to. Mamura ni nen say dotak so ilalo to. Aliwan mabli nen say pitek so bilay to,

¹¹lapud ag ton balut naamtaan so Dios ya anibokel ed sikato tan angingas ed sikato na kamarerwa tan mabilay ya ispiritu.

¹²Abaloan ton singa sakey a galaw so bilay na too, sakey a tindaan a pakatuboan to. Sisiaen to a nepeg a makalmoy kuarta diad panamegley na anggan anton polaing, anggan diad panamegley na kaogsan.

¹³Sayan too ya ikakana toy namparan pitek ed panggagawa to na saray talintaoy diriyos tan saray maibebetag a banga et amta to ni nen saray arum a totoo a sikatoy mankakasalanan.

¹⁴Balet saray sankaambagelan ed amin da ray totoo, a lalon kulang niy kalakal da nen saray ogogaw ya ankekelag, et saray kalaban a nampapairap ed saray totoom, O Katawan.

¹⁵Abaloan da a diriyos ya amin iray paganon talintao ra, anggaman a saray talintao et ag makanengneng iray mata ra, ag ira makaingas so eleng da, ag makadngel iray layag da, ag makalikna ray gamet da, tan ag makakutdang iray sali ra.

¹⁶Ginawa ra na sakey a toon binayes labat so ispiritu to. Anggapoy makagawa na Dios a miparad too.

¹⁷Ag mabayag et ompatey so balang too, balet manlapud gapo inatey la so dinanman a ginawa na maoges a lima to. Maung ni nen say bengatlan gagalangen to. Mabilay, balet aliwan mabilay so gagalangen to, tan ag balut nambilay.

¹⁸Igagalang na sarayan totoo iray sankamakapaingungotan ya ayayep pati anggan saray sankamelagay pakatalus.

¹⁹Anggan diad kipapasen dan ayayep, ag da natanggoyur so siopaman a manlabay ed sikara. Say Dios a dili et nilabsanan to ra nen inabubonan to ray arum a pinalsa tan binindisionan to ra.