Read Pangasinan SAY KAKABATAN NEN SOLOMON 16 Bible Online

SAY KAKABATAN NEN SOLOMON 16 - Pangasinan bible

SAY KAKABATAN NEN SOLOMON 16

¹"Kanyan manepeg a sarayan totoo et adusa ra diad impamairap na amayamay ya onya ran pinalsa.

²"Balet, O Katawan, ag mo dinusa na onya iray totoom, ingen, panangasi so impanengneng mod sikara. Angibaki kad sikara na saray pugon kanen da, matalag tan mananam a kakanen a pamenek na inkaerasan da.

³"Ginawam ira yan amin, pian saray manangigalang ed saray talintaoy diriyos et ag ira makapangan no narasan ira, lapud saray makapaingungot a pinalsan nibakid sikara. Balet agano labat so inkaerasan na saray totoom, insan la ra angan na sankaabigan a kakanen.

⁴"Kanepegan na saray managpairap a manlikna ray ag manganggan pankaukolan, legan a sankanengneng na saray totoom so pakapapairap na saray kalaban da.

⁵"Nen dinogpaan na saray makapataktakot tan masesebeg ya oleg iray totoom tan papateyen da ra diad panamegley na saray dita ra, ag ka nansiansian nampasnuk, pian ag naderal a sigput iray totoom.

⁶"Agano labat a nansiansia yan gunigon, tan agawan sakey a pasakbay. Insan mo ra initdan na makatambal a tanda, samay gansan oleg, a mangipanunot ed sikara na kakaukolan na Ganggan mo.

⁷"No ninmengneng so sakey a too ed saman a tanda, inmabig ed impakaketket na oleg; aliwan samay anengneng to so amaabig, no ag ingen sika a manangilaban na katoowan.

⁸"Diad impanggawam ed saya, apanisiam met iray kalaban mi a sika so mangyaagel ed katoowan diad amin a kaogsan.

⁹"Inaatey ed ketket na dorun tan apangat iray kalaban mi; anggapoy makapaabig ed sikara, lapud kanepegan day dusaen na saratan a pinalsa.

¹⁰Balet anggan saray nanditan oleg et ag da tinalo iray totoom, lapud mapangasi ka, tinulongan mo ra, tan pinaabig mo ra.

¹¹Aketket ira, pian natandaan da ray ganggan mo, balet niagel iran tampol, pian ag da ka nalingwanan a sigput tan ag ira naandian na panangasim.

¹²Anggapoy tambal odino ipopoyuk ya akapaabig ed sikara. Nipawil ed sikaray abig na laman da lapud salitam, O Katawan, say salita a mamapaabig ed amin a katoowan.

¹³Walay pakayarim ed bilay tan patey; nayarian mon iyakar ed puirtay patey so sakey a too tan ipawil mo.

¹⁴Nayarin pateyen na toon maoges so sakey a too, balet ag to napaolid bilay odino makapangyagel na sakey a kamarerwan apriso ed panaayaman da ray inaatey.

¹⁵Anggapoy toon nibatikan to ka.

¹⁶Nengneng mo ra may totoon maoges: ag da ka binirbir a Dios, kanyan dinusam ira diad panamegley na baleg a pakayarim. Tinombuk ira na makapataktakot iran bagyon nantekep na oran tan kristal tan sigput iran aderal na apoy.

¹⁷Say sankamakapakelawan ya agawa et say ontan lan sebeg na apoy ya amool ed danum, a managsebseb na pool. Amin da ray pakayari na pinalsa et milalaban ira a pangyagel dad saray totoon matonung.

¹⁸Aminsan, narep so pool, pian ag to napatey iray pinalsan nibaki a manusad saray totoon maoges. Nepeg a naamtaan na saraman a totoo a tinombuk ira na sintinsiam.

¹⁹Balet aminsan met, nen aliber na danum so apoy, lalon dinmalang imay apoy, kanyan dineral to ray tanaman ed dalin a panaayaman na saraman a totoon aliwan matonung.

²⁰Balet ag ya kinmenan desyang ed saray totoom. Ingen, initdan mo ra na kakanen da ray anghil. Manlapud tawen angipelag ka na tinapay a nayarin kanen a tampol, tan ag da la nepeg ya iparaan. Akaliketan na balang sakey so inter mon kakanen, anggan antoy pakataway da.

²¹Amin da ra ya et impanengneng dan ontan lay maaron panangasikasom ed saray anak mo. Pinenek na saman a kakanen so pilalek na balang sakey a toon angan; naoman pian ontokuy ed pakataway na balang too.

²²Kakanen iman a nepeg komun a naandipat a singa yilo, balet ag atonaw natan anggan diad apoy. Say getma na saya et say pangibangat ed saray totoom a samay apoy a manederal ed tanaman na saray kalaban da legan na maples ya ipepelag na oran tan yilo

²³et binabawi toy pakayari to, pian nawalaan na kakanen iray dilin matonung a totoom.

²⁴Pinalsam so sansinakuban; walad silong na panangiganggan mo. Ikakana na amin a pinalsa so pakayari ra diad panusa ra ed saray totoon aliwan matonung, balet magmamaliw ya anlemew tan mapangasi ed saray manmamatalek ed sika.

²⁵Inala na pinalsa so amin a klasiy nengneng, pian niparontal to so mabonluk a pangiiter mod nakakaukolan da ray mampipikasi ed sika.

²⁶Agaway onya, pian naaralan na saray totoon inarom, O Katawan, a napapakan ira aliwan diad panamegley na itatanem da. Say salitam so mantatalima ed saray totoon manmamatalek ed sika.

²⁷Atonaw so kakanen ya ag dineral na apoy, nen apetangan na ononan sinag na liwaway aagew.

²⁸Agawa ya, pian nibangat to kami a nepeg miy ombangon kasakbayay ipelnak na liwawa a misalamat ed sika, tan mampikasi legan ya ompapaway so agew.

²⁹Balet natonaw a singa yilo so ilalo na toon ag to amtay misalamat, tan onagos a singa danum ya ag nikakana.