Read Pangasinan SAY KAKABATAN NEN SOLOMON 18 Bible Online

SAY KAKABATAN NEN SOLOMON 18 - Pangasinan bible

SAY KAKABATAN NEN SOLOMON 18

¹"Balet legan da ra yan nagagawa, maliwliwan silew so onsisindag ed saray masanton totoom. Nadngel na saray kalaban da so bosis da, balet ag da ra nanengneng. Makakaibeg irad maung a kapalaran na saray totoom ya ag ira maniirap.

²"Akisalsalamat ira yan kalaban, lapud ag ombabawid sikara natan iray totoon nanggawaan day makapoy, kanyan kinerew dan ontaynan la ra.

³"Insan mo inwanwan iray totoo legan dan binmeltang ed bansan ag da amta. Inwanwan mo rad panamegley na lusek ya apoy. Singa agew iman ya apoy tan ag to ra pinasakitan ed saman a biahin mapagalang.

⁴"Balet saray kalaban da, ya ag ira naabuloyan a makanengneng ed samay apoy, et kanepegan day apriso ed kabilongetan, lapud impriso da ray totoom. Diad panamegley na saray totoom, say andi-anggaan a liwawa na Ganggan mo et niiter ed sankamundoan.

⁵"Nen gagawaen na saray kalaban mo so pilalek dan mamatey ed saray masususon anak na saray masanton totoom, walay sakey ya ogaw a nikaindan balet niagel lamlamang. Insan mo dinusa iray kalaban mo diad impamatey mo na amayamay ed saray dilin anak dan ankekelag. Impalner mon amimpinsan iray amin a sondalo ra, diad mapmaples a danum.

⁶"Balet nipasakbay a nibagad saray lalaki mi no antoy nagawad saman a labi, pian naligliwa ra tan napabiskeg so linawa ra diad inkasumpal na saray sipan mod sikara.

⁷"Amtad saman na saray totoom ya iyagel moy matonung a bansa tan deralen mo ray kalaban da.

⁸"Diad panamegley na saman lamlamang a ginawam, dinusam iray kalaban mi tan inter mod sikami so marlang a kagalangan na impanawag mod sikami ed sika.

⁹"Legan na sayan panaon, saray matoor a totoon taga sayan matonung a bansa et maamut a mangisasaklang ira na saray bagat, tan nampapakna ran mangonur na ganggan na Dios tan mannanagnagan ira na saray bindision tan saray kaatapan. Kakantaen da la iray dagdaan ya imno na dayew.

¹⁰Balet nadngel ed anggan iner a pasen so pangaskasian ya akis na saray kalaban da, legan ya eermenan da ray inaatey ya anak da.

¹¹Say dusan inter mod saray aripen et kapara na dusan inter mod saray amo; say abalang na saray karaklan et kapara na abalang na ari.

¹²Ag nabilang iray bangkay lapud karakel da. Kulang iray totoon nakdaan a mangipompon ed sikaran amin. Diad sakey a bekta, inaatey iray inararon anak da; saksakey a polaing so impatey dan amin.

¹³Ag inngalngalep na sarayan totoo so anggan dinan a pasakbay, no ag ingen nanmatalek irad saray pakayari na panagsalamangka ra. Balet nen inatey iray pangulowan ya anak dan lalaki, abirbir dad satan a say Israel et lakin anak na Dios.

¹⁴Asumpal lay kapaldua na antikey a labi, tan mapalna tan mareen so kaliber-liber,

¹⁵nen biglan agawa iray taktakot mo! Maples a nanlapud tronom ed tawen so ag natalon salita na pananintinsiam, tan tuloy-tuloy a dinmapod saman a dalin a nigana lan naderal. Sinmabin singa masebeg ya indogpa na sakey a sondalo,

¹⁶diad panusumpal toy malet a ganggan mo. Sankaawit toy makapataktakot ya armas, tan akatalindeg a walad dalin iray sali to tan ontotokdul ed tawen so olo to. Pinano to na patey so dalin.

¹⁷Diad saman a bekta, saramay totoon ngalngali la ompatey et makapaingungot iray kogip da tan bigla ran ataktakot na pinasya.

¹⁸Diad intiron dalin patey-pateyan iran mandokdokul tan impaamta ra no akin et ompapatey ira.

¹⁹Amta ra no akin et ompapatey ira, lapud imbagad sikara na saramay makapataktakot a kogip da.

²⁰Sinmabi met so patey ed saramay matonung a bansa, lapud dinalan na sakit so amayamay ed sikara nen wala rad kalawakan, balet ag nambayag so pasnuk mo.

²¹Walay sakey a lakin anggapoy pakabalawan ed sikato a ginmalaw a tampol a mangyagel ed sikara. Diad kipapasen ton pari ra, angyapay si Aaron na saray pikakasi tan nampool na insinso ya ikakanad pikekerew na pirdonad saray kasalanan. Diad panamegley na saray pinagkaarmas ton pikakasi tan insinso, binaat toy pasnuk mo tan pinatonda toy desyang. Diad impanggawa tod saya, pinaneknekan to a sikatoy aripen mo.

²²Apatonda to may ampait a kairapan, balet aliwan lapud biskeg ton dili odino lapud biskeg na saray sondalo. Ingen, inkana toy pikakasi a pamatondad samay dusa, tan impanunot to iray sipan a sinambaan mod saray lalaki.

²³Nantatabunan la ray bangkay, balet inmapireng si Aaron a patondaen toy pasnuk mo tan ag mo la padapoan na mamasakit ed saray akeraan a mabilay.

²⁴Nansolung na andokey a kawes a naarkosan na saray tanda na sansinakuban. Diad pamagalang ed saray lalaki mi, angyan ed pagew to na apatiran dasig na saray mabmablin bato ya atatakan, tan nilaman na arkos ed turban to so dilin kagalangan mo.

²⁵Antakot so Anghil na Patey ed sarayan bengatla, kanyan sinmuko. Melag labat imay ya impakatawag ed sanuk mo, balet magenap la.