Read Pangasinan SAY KAKABATAN NEN SOLOMON 2 Bible Online

SAY KAKABATAN NEN SOLOMON 2 - Pangasinan bible

SAY KAKABATAN NEN SOLOMON 2

¹"Nalilingo ray totoon maoges no kuandad sikaran dili, Antikey so bilay mi tan napno na kaermenan, tan no onsabi lay samput to, anggapo lay nagawaan. Anggapo niy akabatan a toon akapawil a nanlapud pasen a panaayaman da ray inaatey.

²"Nianak itayo ya andid plano, et no mansamput lay bilay, singa met ni lamlamang ag itayo nianak a balut. Singa pugsoy asewek so ingas tayo; singa talagsik na mamparuk a puso tayo so kanunotan tayo.

³"No narep lay talagsik, magmaliw a dapul so laman tayo, tan magmaliw a kabyangan na dagem so ingas tayo.

⁴"Diad idalan na panaon, anggapoy makanunot ed antokaman a ginagawa tayo, tan nalingwanan so pati kangaranan tayo. Naandin singa lorem so bilay tayo, tan onlabas a singa kelpa ed petang na agew.

⁵"Singa onlalabas ya anino so panaon tayo ed tapew na dalin. Ag napaliisan so agew na ipatey tayo; nigetar, et anggapoy siopaman a pakapangikuntang.

⁶"Kuan na saray totoon maoges, Sigi sirin, panliketan tayo ray maung a bengatla na bilay, tan mambilay itayo diad tapew na dalin a singa impanbilay tayo nen malangwer itayo ni ya anggapoy kapagaan tayo!

⁷"Oninom tayo na sankablian iran alak tan ikana tayoy sankaabigan iran pabalingit. Ag tayo papalabasen so anggan saksakey a rosas no panaon to!

⁸"Kasakbayay kalenes na saray rosas, getelen tayo ra tan ipeket tayo rad buek tayo!

⁹"Mankakasakey tayo tan mangitilak tayo ed inerman a pasen na saray tanda na anggapoy kapagaan ya impanliliket tayo! Kanepegan tayo yan gawaen!

¹⁰Pairapen tayo ray mairap-bilay, anggan matonung ira. Ag tayo pagalangan iray bibiin balo odino mamatakken a totoo.

¹¹Ipasen tayon matonung so sikatayon dili no walay biskeg tayon mangala na labay tayo. Anggapoy toon inmaligwas diad panamegley na inkakapoy!

¹²Makaskasbel labat iray totoon matonung, kanyan mananap itayoy pankanawnawan mamatey ed sikara. Sumpa rad gagawaen tayo; aakusaen da itayon onsusumlang ed Ganggan nen Moises tan onsusumpad saray kaogaliyan da ray lalaki tayo.

¹³Ibabaga ran kabat day Dios, tan ipapasen day sikaran dili ya anak na Katawan.

¹⁴Ag tayo naanosan a nengnengen iray ontan a totoo; susumpaen na inkatoo ra so intiron panagnunot tayo.

¹⁵Aliwan ran singa arum a totoo; domay kagagawa ra.

¹⁶Abaloan dan marotak iray ikakana tayon totontonen ed panagbilay, kanyan nepeg a paliisan so antokaman a gagawaen tayo. Ipapanta ra a say Dios so Ama ra, tan manisia ra a no nibaga tan agawa lay amin, saray matonung labat so manliket.

¹⁷Balet nengnengen pa no tua tan kasi! Nengnengen pa no antoy nagawa no oras na ipatey da!

¹⁸No tuan anak na Dios iray matonung, iyagel ira na Dios ed saray kalaban da.

¹⁹Kanyan suboken tayo ra. Magmaliw tayon maruksad sikara, tan pairapen tayo ra; nengnengen pa no panoy kareen da tan inkadugay panagnunot da!

²⁰Naamtaan tayo so anggaan na inkaanos da! Sintinsiaan tayo ra na makapabaing ya ipapatey. Andi bali, ta kuandan iyagel ira na Dios.

²¹Onya so panagnunot na saray totoon maoges balet alingo ra. Abulag ira na dilin kaogsan da.

²²Ag dan balut naamtaan iray iyaamut na Dios; ag iran balut nanilalo ed saray tumang na masanto tan anggapoy pakabalawan a bilay.

²³Nen pinalsa itayo na Dios, ag to ginetman ompatey itayo; ginawa to itayon singa sikato.

²⁴Say ibeg na Diablo so angyakar na patey ed mundo, tan saray kayaryan na Diablo so ompatey.