Read Pangasinan SAY KAKABATAN NEN SOLOMON 3 Bible Online

SAY KAKABATAN NEN SOLOMON 3 - Pangasinan bible

SAY KAKABATAN NEN SOLOMON 3

¹"Balet iyaagel na Dios iray totoon matonung tan ag iran balut manliknay kairapan.

²"Inaambagel a lingo so pannunot ya ompapatey iray totoon matonung tan makapasinagem a kaogsan so ipapatey da.

³"Tataynan da itayo, balet aliwa yan sakey a desyang. Diad tuay tua, walad kareenan iray totoon matonung.

⁴"Nayarin singa ra adusa, balet walay malet ya ilalo ra a mansiansia ran mambilay.

⁵"Anggapoy wala iray kairapan da no ipara rad saray bindision ya awaten da. Sinubok ira na Dios, a singa say balituk ed palbaan, tan nalmoan to ran manepag a mikasakey ed sikato. Inawat to ra, a singa pangaawat tod saray bagat a popoolan ed altar na saray manangigalang ed sikato.

⁷"No onsabi so Dios a mangiter na tumang ed saray totoon matonung, onliab iran sumpad saray totoon maoges a singa ra apoy ed dayami.

⁸"Manoley irad saray bansa tan saray totoo, tan anggad anggan ari ra so Katawan.

⁹"Saray manmamatalek ed Dios naamtaan da so katwaan na kagagawa to. Saray matoor mambilay irad sikato ed aro, ta mapangasi tan maabagey ed saray totoon pinili to.

¹⁰Balet nadusa iray totoon maoges onung na kanepegan na saray maoges a kanunotan da, lapud linmaban irad Katawan tan ag da inkabilangan so inkatonung.

¹¹Makapasinagem a bilay so akaparaan ed toon ag to ikakanay kakabatan odino aral. Anggapoy bengatlan nailaloan to. Andi-kakanaan iray kimey to, tan anggapoy nagawaan ton makabaliksan.

¹²Magmaliw ya ag napampiaan so biin asawaen to, tan aliwliway pansumpalan na saray anak to.

¹³Nisamba ya amin iray kabyangay boleg to. No Agew na Okum, tumangan na Dios so biin ag balut nananak, dapot no ag akikaloguran. Diad ontan, sikatoy manliket.

¹⁴Diad satan ya agew, natumangan na liket so anggan say lakin akapun, no inonur toy Ganggan tan ag to amokuk na sakit na linawa sumpad Katawan. Lapud sikatoy matoor, awaten toy tumang a mabli ni nen say nawalaan na saray anak: sakey a pasen ed mangatatawen a Timplo na Katawan.

¹⁵Saray maung a gawa et singa ra kiew a mambubunga na makapakelaw iran prutas. Singa mabilay a lamut so Kakabatan, ta makapatubo lawas na balo ran simit.

¹⁶Balet ompatey a masakbay iray anak na saray mikakaloguran odino saray ag da kanepegay manakdul.

¹⁷Anggaman bilang mambilay ira na andokey, anggapoy maung lamlamang a kasumpalan da. Ag ira napagalangan ed inkatakken da,

¹⁸tan no ompatey iran malangwer, anggapoy ilalo ra odino ligliwa ra no Agew na Okum.

¹⁹Manlilikna na makapasinagem a kapalaran iray anak na saray ag da kanepegay manakdul.