Read Pangasinan SAY KAKABATAN NEN SOLOMON 4 Bible Online

SAY KAKABATAN NEN SOLOMON 4 - Pangasinan bible

SAY KAKABATAN NEN SOLOMON 4

¹"Maung nin walad sikay masimpit a panagbilay, anggaman a kabaliksan toy ag ka nawalaan na saray anak. Nabirbir na arum a totoo tan say Dios so masimpit a panagbilay mo, tan nanunotan kad anggad angga lapud satan.

²"Say masimpit a panagbilay et mangiiter na maung a pangaligan na saray totoo; no naandi, anapen da. Sikato lawas so sankaabigan a tumang a nagamuran na sakey a too, tan mansiansian onya. Sikatoy sankamaungan ed amin da ray marakep a kagagawa na too.

³"Anggan anto lay karakel na anak da ray ag da kanepegay manakdul, anggapod sikaray maung so pansumpalan to. Anak irad paway; ag iran balut makapangilira na malet a pundasion a para sikaran dili; ag balut makaaralem so lamut da.

⁴"Singa ra saray kiew ya atapew so lamut da, a makapambulong iran magano, balet ipapalig-palig ira na dagem, tan babaguten ira na bagyo.

⁵"Napopoter iray sanga ra kasakbayan iran ontakken; ag balut naluluto so bunga ra, tan anggapoy kakanaan da.

⁶"No Agew na Okum, saray anak da ray ag da kanepegay manakdul et paneknekan day kasalanan na saray atateng da tan mantasi ra sumpad sikara.

⁷"Balet makarumog na inawa iray totoon matonung, anggaman ya ompatey iran malangwer.

⁸"Papagalangan tayoy inkatakken, balet aliwan lapu labat ya andokey so bilay na sakey a too.

⁹"Say Kakabatan tan say inkatonung et tanda ra na inkadugay kalakal, a nepeg a katekep na inkatakken.

¹⁰Aminsan walay lakin manngaran na Enoc a makapaliket ed Dios, tan inaro na Dios. Nen mambibilay ni si Enoc a kaiba to ray makasalanan, inala na Dios,

¹¹pian ag narotakan so kanunotan tan kamarerwa to na kaogsan tan tila. (

¹²Amta tayon amin a diad mapalalon kakaayat na saray totoo ed kaogsan, ag da la nabirbir no antoy maung, anggaman a walad arap da. Saray totoon anggapoy kasalanan et nayarin narotarotakan ira na maoges a pilalek, kanyan anggapoy arum a nanunotan da no ag say labay da.)

¹³Agawaan na sayan toon Enoc ed pigaran taon so inkayadyari ya ag nagawaan na arum a totoo ed intiron bilay da.

¹⁴Akaliket so Katawan ed bilay nen Enoc tan impaway ton tampol ed sayan maoges a mundo. Amta na saray totoo so intaynan to, balet ag da atalusan. Ag dan balut naaralan

¹⁵a mapangasi tan maabagey so Dios ed saray dilin totoo to; iyaagel to ray totoon pinili to.

¹⁶Anggan inatey tan naandi la ray totoon matonung, papabaingan da ray totoon maoges a mambibilay ni. Saray tobun-balon akarapat la na inkayadyari et ipelag dad kababaingan iray mamatakken a totoon maoges.

¹⁷Nayarin ompatey a malangwer iray totoon makabat, balet ag balut natalusan na saray totoon maoges a sikato yay polaing na Dios a pangekal tod sikarad kaatapan.

¹⁸Leleglemewen day impatey na toon makabat, balet ag mabayag elekan ira na Katawan. No ompatey ira, ag ira naitdan na mapagalang a pompon. Andi-anggaan a balawen tan pakaingungotan ira na anggan saray inaatey.

¹⁹Ibantak ira na Dios ed dalin tan gawaen to ran ag makasalita. Magmaliw iran bunton na deral-deral, a singa saray paalagey ya ayakayak iray pundasion da. Sikaray napairap. Ag mabayag nalingwanan la ra na saray totoo.

²⁰Ondago ran natatakot ed Okum, a pakabilangan na saray kasalanan da; manalagey iran sinintinsiaan na saray dilin kagagawa ran sumpad ganggan.