Read Pangasinan SAY KAKABATAN NEN SOLOMON 5 Bible Online

SAY KAKABATAN NEN SOLOMON 5 - Pangasinan bible

SAY KAKABATAN NEN SOLOMON 5

¹"Diad satan ya agew, say toon matonung et mataletalek a manalagey ed arap da ray nampairap ed sikato tan nanleglemew ed saray kimey to.

²"Nikelawan irad pakanengneng da ya anggapoy maoges ya agawad sikato tan onggiwgiw irad mapalalon takot da.

³"Insan da pagbabawian so ginawa ra, tan managlem irad ermen a mangikuan ed sakey tan sakey:

⁴"Sikato ya may inelek-elekan tayo. Abaloan tayon sakey a lurey. Agaylay inkakulang-kulang tayod saman! Abaloan tayon sakey ya ambagel lapud impanbilay to, tan nen inatey, ag tayo pinagalangan.

⁵"Et wadya natan, sakey ed saray dilin anak na Dios, a walay pasen tod saray dilin totoo na Dios.

⁶"Sikatayoy sinmian ed dugan dalan. Ag itayon balut nambilay ed liwawa na inkatonung; ag tayon balut akasagap na wandag na liwawa to.

⁷"Legay bilay tayo nanakar-akar itayod anggapoy tandan kalawakan, anta nepeg tayo komuy nankurang ed dalan a labay na Katawan a panakaran tayo. Sayan ag pangingalngalep ed ganggan et inyakar to itayod deral.

⁸"Agaylay panangikinon tayod sikatayon diliinlalastug tayoy ontan lan inkayaman tayoet natan, antoy kamaungan ya agawaan tod sikatayo?

⁹"Natan naandi lan amin ira man a bengatla; naandipat la ran singa anino, a singa bengatlan narengel mo insan mo nalingwanan.

¹⁰Ombabaliw ed saray daluyon na dayat so sakey a bapor, balet no akadalan la, anggapoy bakat a pakatontonan. Ag mo nibagan dinmalan diman.

¹¹Ontitikyab ed tagey so sakey a manok, balet anggapoy ititilak ton tanda a nanlapud man. Maples ya ontitikyab; onsosorub ed dagem diad panamegley na biskeg na saray payak to, ya anggapoy ititilak ton pakapatnagay indalan to.

¹²Bebelsayen na pana so dagem no nibolus ed sakey a kekenaen, balet tampol a mansaip so dagem a dinalan to, tan anggapoy makapangibaga no iner so dinalan to.

¹³Ontan met so agawad sikatayo; nianak itayo, insan tinmonda itayo lan nambilay. Anggapoy tanda na masimpit a panagbilay ya intilak tayo; dineral itayo na inkaoges tayo.

¹⁴Antoy ilalon walad saray totoon maoges? Say ilalo labat na dayamin itiktikyab na dagem, say ilalo na borad dayat a nanaandid bagyo, say ilalo na asewek ed palayupoy na dagem. Ag mambabayag so ilalo ra, a singa say pakanudnunotan ed toon sinangkailid sayan agew tan tinmaynan ed ontombuk ya agew.

¹⁵Balet mambibilay ya andi-anggaan iray totoon matonung. Tumangan ira na Katawan; iyagel ira na Sankatageyan.

¹⁶Itdan to ra na kagalangay ari tan say marakep a korona. Salimbengan to ra na saray makapanyarin taklay to.

¹⁷Onlan mibakal a ginetma ton taloen iray kalaban to, tan ikana ton armas iray dilin pinalsa.

¹⁸Say inkatonung so kawes ton para bakal, say petepeteg a kaptekan so hilmit to,

¹⁹tan say inkasanto so ag natalon samper to.

²⁰Obulen ton sakey ya ispada so mapalalon pasnuk to, tan mikasakey ed sikato iray biskeg na pinalsa diad pilaban tod saray anggapoy kalakal ya onsumpad sikato.

²¹Ompogtad kekenaen iray laris na kirmat, a singa nanggawa so Katawan na panan lorem tan mangipapana.

²²Makmaksil ya ondapod saray kalaban to iray oran a kristal. Mapmaples ya onsabid sikara so makaderal a delap na saray dayat tan saray ilog.

²³Mabiskeg iran bagyo so ombasig ed sikara, et ombantak iran singa dayami. Say ag pangingalngalep ed ganggan so kaderalan na intiron mundo. Saray maoges a gawa so kapelagan na saray gobirno.