Read Pangasinan SAY KAKABATAN NEN SOLOMON 7 Bible Online

SAY KAKABATAN NEN SOLOMON 7 - Pangasinan bible

SAY KAKABATAN NEN SOLOMON 7

¹"Ompatey ak a singa arum a too. Nanlapwak ed samay inmonan too a ginawad dalin. Nilokun ak manlapud bini na sakey a laki, diad impanliket na bii tan laki. Diad loob na siam bulan, antibokel so laman ko ed dala na eges na inak.

³"Nen nianak ak, pinmaway ak ed mundo a singa arum a totoo. Ginmapo ak a sinmongap na dagem a sosongapen tayon amin; tan singa arum a totoo, akis so inmonan tanul a ginawak.

⁴"Abalkut ak na lamping tan naasikaso ak.

⁵"Anggapoy arin domay inggapo na bilay to.

⁶"Para sikatayon amin, saksakey so iloloob ed bilay, tan saksakey so ipapaway.

⁷"Diad impakabirbir kon sakey ak labat a too, nampikasi ak, et naitdan ak na pakatalus. Sinmabid siak so ispiritu na Kakabatan.

⁸"Atagey niy impangipasen kod Kakabatan nen say dinanman a trono odino koronay ari. Anggapoy kuintay kayamanan no iparad Kakabatan.

⁹"Ag makasimbang so kablian na saray alahas ed kablian na Kakabatan; no iyabay ed Kakabatan, amin a balituk ed mundo et singa ra labat sankaakup a buer, tan say pilak et singa labat pitek.

¹⁰Impasen kon mabli ni so Kakabatan nen say abig-laman tan maung ya indengan. Ag balut ombibilonget so karlangan na Kakabatan tan labay ko ni nen saray arum a liwawa.

¹¹Kaolup na Kakabatan iray amin a maung a bengatla nen sinmabid siak. Inawitan to ak na ag nibalikas a kayamanan.

¹²Nanliketan ko ran amin, lapud inawit irad siak na Kakabatan. Ag ko abirbir nen saman a panlalapwan na sarayan amin a bengatla so Kakabatan.

¹³Masimoon ak a nanaral ed Kakabatan, et natan maliket ak a manginagnag na naaralan ko.

¹⁴Anggapoy makaoput na saray kayamanan na Kakabatan. Kakaaro kayo na Dios no ikana yo ra tan a kayamanan; aabubonan na Dios iray nanaaralan yod Kakabatan.

¹⁵Mampipikasi ak ed Dios a saray kanunotan ko et onnepeg ira komun ed naaralan ko, tan makapansalita ak komun onung ed linawa to. Sikato so manangiwanwan na Kakabatan; pepeteken to ray totoon makabat.

¹⁶Wala itayod silong na pakayari tan pakaoley tosikatayon dili, saray salita tayo, amin a pakatalus tan dunong tayo.

¹⁷Sikato so angiter ed siak na tuan pakatalus ed saray biskeg da ray pinalsa: no antoy inkagawaan na mundo; no panoy ikukurang na saray iliminto;

¹⁸no panoy itotombuk na kalindario ed igagalaw na agew, saray mansasalat a panaon,

¹⁹saray grupo na bitewen, tan say pantetelek na saray taon.

²⁰Imbangat to ak na nipaakar ed saray mabilay a pinalsa, say kagagawa na saray ayayep ed katakelan, say biskeg na dagem, saray pakayari na katoowan a mannunot, saray nandoroman klasi na tanaman, tan say kana na saray lamut dan tambal.

²¹Naaralan ko ray bengatlan kabkabat la tan saray bengatlan ag ni akabatan nen saman,

²²lapud say Kakabatan, a manitibokel na amin a mambibilay, et sikatoy bumabangat ko. Maotek tan masanto so ispiritu na Kakabatan. Saksakey so inkanatural to, balet ipapaamta toy sikaton dili diad panamegley na amayamay a polaing. Ag agawad antokaman a bengatlan matiryal, tan makaiwas-iwas ed anggan iner. Malinew, malinis, tan matalek; ag nayarin napaakitan. Inaro toy kamaungan. Matdem tan ag nayarin taloen,

²³mapangasi, tan kaaro na katoowan. Napanmatalkan tan ag manduaruwa, tan anggapo ray gunigon to. Walay pakayari to ed amin a bengatla, tan sankanengneng toy amin a bengatla. Tetebeken toy balang ispiritun maotek tan puro, anggan anto lay impis na inkagawa to.

²⁴Mainomay nin onggalaw so Kakabatan nen say dilin kagagalaw; lapud inkapuro na Kakabatan, tetebeken toy amin a bengatla.

²⁵Ingas na pakayari na Dios so Kakabatanpuro tan marmarlang a talagsik na kagalangan a manlalapud Makapanyarin-amin. Ag makasabid Kakabatan so antokaman a bengatlan marotak.

²⁶Aninag na andi-anggaan a liwawa so Kakabatan, sakey ya ayadyarin ispiho na gagawaen tan kaabigan na Dios.

²⁷Anggaman a mankikimey a bukor so Kakabatan, nagawaan ton amin. Gagawaen ton balo so amin a bengatla, anggaman ya ag mangooman. Manlapud sakey a kailalakan ya anggad sananey a kailalakan, say Kakabatan et onloloob ed saray kamarerwa da ray totoon masanto, tan gagawaen to ran kakaaro tan propita na Dios.

²⁸Anggapoy lalon aaroen na Dios nen saray totoon maliket ed Kakabatan.

²⁹Marakep ni so Kakabatan nen say agew tan amin da ray grupo na bitewen. Maung ni nen say dilin liwawa, lapud totombuken lawas na labi so agew, balet ag balut tataloen na kaogsan so Kakabatan.