Read Pangasinan SAY KAKABATAN NEN SOLOMON 8 Bible Online

SAY KAKABATAN NEN SOLOMON 8 - Pangasinan bible

SAY KAKABATAN NEN SOLOMON 8

¹"Lalaknaben na baleg a pakayari to so balang parti na mundo, tan ililira tod makanan oksuy iray amin a bengatla.

²"Inarok so Kakabatan. Kinaraw ko nen ogaw ak ni tan nilabay kon asawaen. Naibegan ko so ganggana to.

³"Papagalangan na Kakabatan so kagalangay nanlapwan to diad panamegley na piaayam tod Dios, say Katawan na amin a bengatla, a mangaarod sikato.

⁴"Kabkabat to ray mistirio na Dios tan tutulongan tod pangamta no antoy nepeg a gawaen to.

⁵"Maung so walay kayamanan ed sayan mundo? Anggapoy lalon makapayaman ed sika nen say Kakabatan a mangipapakurang na amin a bengatla.

⁶"Makanan nakayaryan so pakatalus? Anggapoy magmaung ni nen say Kakabatan ya anibokel na amin a mambibilay.

⁷"Inaro yo so inkatonung? Manlalapud kimey na Kakabatan iray amin a maung a kagagawa; inkatonung tan biskeg na linawa, panagadya tan pakatalus. Anggapoy magmaung nin niiter na bilay nen saraya.

⁸"Labay mon nawalaan kay malaknab a salsalid bilay? Amta na Kakabatan iray aral a niiter na saray apalabas ya agawa tan nayarian ton ipasakbay so nagawad arapen a panaon. Amta ton ipatalus so ibabaga na saray totoo tan no panoy pamaandid saray problima. Amta to iray milagron gawaen na Dios, tan no panoy pansumpalan na saray nagagawa.

⁹"Kanyan ginetmak ya awiten ed abung ko so Kakabatan, ta miayam ed siak, lapud amtak ya itdan to ak na maung a simbawa tan pabiskegen toy linawak no panaon na gunigon tan ermen.

¹⁰Ninunot kod siak a dili, Lapud Kakabatan napagalangan ak diad inermay pantitiponan na totoo. Pagalangan ak na saray mamasiken, anggaman a malangwer ak ni.

¹¹Naalmoan da a makabaliksan iray kanunotan ko, tan idayew ak na saray walad pakaoley.

¹²No ag ak oneseesel, alagden day pansalitak; no mansalita ak ondengel ira. Anggan andokey so pansalitak, iyapasakey day kanunotan da ya ondengel ed siak.

¹³Lapud Kakabatan nagamuran koy ag ipapatey; mambilay ak ya anggad angga ed kanunotan da ray mambilay ya ontombuk ed siak.

¹⁴Nawalaan ak na pakayari ed saray bansa tan saray totoo;

¹⁵diad pakabitla na ngaran ko, ontakot la ray tatakotan ya arari. Ombantug ak a singa maung ya ari tan masebeg a sondalo.

¹⁶No onsempet ak ed Kakabatan, narumog koy inkapenek, lapud say piamung ed sikato et kabaliksan toy anggapoy kolkol odino sakit na linawa; say wala labat et say liket tan gayaga.

¹⁷Kanyan ninudnunot ko: say piasawad Kakabatan et pambilay ya andi-anggaan,

¹⁸say pangarod sikato et panliket na ayadyari, say panggawad kimey to et pakagamur na kayamanan ya ag nabilang, say piolup ed sikato et pakagamur na maung a pananintinsia, say pitongtong ed sikato et pakagamur na kagalangan. Kanyan ginetmak ya alaen a nubia so Kakabatan.

¹⁹Makaayayat so inkatook anggan nen ogaw ak ni. Mapalar ak ya akaawat na maung a kamarerwa, odino naitdan ak na maabig a laman a pambilayan ko, lapud maung ak la nen saman.

²⁰Anggaman ontan, abirbir ko ya ag kon balut naawat so Kakabatan no ag iter ed siak na Diostan say pakaamtak a say Dios labat so makaiter ed siak na Kakabatan et sakey lan tanda na pakatalus. Kanyan nampikasi ak, tan diad intiron pusok kinerew kod Katawan: