Read Pangasinan SIRAC 1 Bible Online

SIRAC 1 - Pangasinan bible

SIRAC 1

¹"Manlalapud Katawan so amin a kakabatan, tan anggad angga a walad sikato so Kakabatan.

²"Siopay makabilang ed saray terter na oran odino saray buer ed gilig na dayat? Siopay makabilang ed saray agew na andi-anggaan a panaon?

³"Panon kaatagey so tawen? Panon kaawang so dalin? Panon kaaralem so dayat? Panon kalaknab so Kakabatan? Walay toon makarumog na ebat na sarayan tepet?

⁴"Apalsa so Kakabatan kasakbayan na inkapalsa na arum a bengatla; wala lawas so pakatalus.

⁶"Wala lay toon angipanengneng no iner so panlalapway Kakabatan? Walay toon makakatalus na ontan lan inkasilib na Kakabatan?

⁸"Walay saksakey labat a makabat, et nepeg tayoy manalalagey ya atalagnaw ed arap na trono to.

⁹"Say Katawan a dili so amalsa ed Kakabatan; anengneng to tan abirbir toy kakanaan to, kanyan pinano to na Kakabatan so balang bengatlan pinalsa to.

¹⁰Agetaran so Kakabatan ya inter tod balang too, balet imbung to so Kakabatan ed saray mangaaro ed Katawan.

¹¹No takotan moy Katawan, nakayaryan moy galang tan dayew; nalingbus kay liket tan gayaga.

¹²Liket na puso so pamagalang ed Katawan; itdan to ka na andokey tan maliket a bilay,

¹³tan maung ya amiy kasumpalan mo no kaonuran na saray agew mo. Bindisionan ka na Dios ed agew na ipatey mo.

¹⁴Say itakot ed Katawan so ononan kupbang a mamaarap ed Kakabatan. Niiter la so Kakabatan ed saray totoon matoor anggan wala ni rad eges na ina ra.

¹⁵Abaybayag lan panaon ya akilimug ed sikatayo so Kakabatan tan manmatalek ed Kakabatan iray kailalakan ya onsabi.

¹⁶Asigsigput a Kakabatan so itakot ed Katawan; sigput a pepeneken to itayo na saray rigalo to

¹⁷tan papanoen to ray kaabungan tan saray kamalir tayo na amin a pilalek na kapusoan tayo.

¹⁸Say itakot ed Katawan et rosas na Kakabatan a mangiiter na kareenan tan abig-laman.

¹⁹Singa oran a mangipepeleg na pakatalus tan pakaamta, tan pararakelen toy kagalangan na saray mangaawat ed sikato.

²⁰Say itakot ed Katawan et lamut na Kakabatan; andokey a bilay iray sanga-sanga to.

²²Anggapoy nibaraan ed andid katonungan a pasnuk; makapangipelag ed sika.

²³Manalagar tan mananos ka, et ag mabayag onggayaga ka lapud nanalagar tan nananos ka.

²⁴Mandeen ka ya anggad manepeg a panaon na pansalita, et napagalangan ka lapud dugan panagnunot.

²⁵Say Kakabatan walay panagsinupan to na saray makabat a balikas, balet panagbalaw ed inkasanto so wala labat ed saray makasalanan.

²⁶No labay moy magmaliw a makabat, onur mo ray ganggan na Katawan, et itdan to kay daakan a Kakabatan.

²⁷Kakabatan so itakot ed Katawan tan sakey ya aral. Napapaliket so Katawan lapud inkatoor tan panagpaabeba.

²⁸Magmaliw kan matoor ed panagrilihion mo; no igalang mo so Katawan gawam ed intiron pusom.

²⁹Alwaran moy amin ya ibabagam, tan ag ka mansisimpisimpitan.

³⁰Ag ka mapaatagey; nayarin natumba ka tan napelag kad kababaingan. Iparontal na Katawan so iyaamut mo tan paabeben to ka ed arap na balang sakey a too ed sinagoga, lapud ag ka linmad man a sigagalang ed Katawan, no ag ingen napno na pansimpisimpitan so pusom.