Read Pangasinan SIRAC 10 Bible Online

SIRAC 10 - Pangasinan bible

SIRAC 10

¹"Panaralen na makabat a manoley iray totoo to, tan maokoksuy so oley to.

²"Amin da ray opisyal tan amin da ray ombaley et magmaliw a singa manoley da.

³"Deralen na arin anggapoy aral iray totoo to, balet ombiskeg so oley no makabat iray manoley to.

⁴"Aasikasoen na Katawan so oley ed mundo tan mangyaakar na dugan toon manoley ed dugan panaon.

⁵"Walad saray lima na Katawan so aligwas na satan a too. Say Katawan so panlalapwan na galang a niiiter ed siopaman ya opisyal.

⁶"Ag ka mamapasnuk ed siopaman lapud balang melag a bengatlan makapoy a gagawaen to. Ag mo gagawaey bengatla lapud asakitan so liknaan mo.

⁷"Kabosul na Katawan tan too so panagpaatagey tan ag inkatonung.

⁸"Makapangyepas ed pakayari na saray bansa so ag inkatonung, panagpaatagey, tan kayamanan, insan napaatagey iray arum a bansa ya onsalat ed sikara.

⁹"Dabuk tan dapul itayo labat; antoy nipasirayew tayo? Naboboluk so laman tayo anggan mabilay itayo ni.

¹⁰Pakagogoloay olo na doktor so mabayag a sakit. Nayarin mabilay natan so anggan ari, balet nabwas inatey la.

¹¹No inatey lay too, saray kayaryan to labat et saray bigis, apangat, tan saray alumbayar.

¹²Onggapo so panagpaatagey no ikaindan la na sakey a too so Katawan a manamalsa to.

¹³Say panagpaatagey et singa sobul a mangipapatoro na kasalanan, tan siopamay mansiansia ed saya et napano na kaogsan. Sikato yay makasengeg a mapalaloy impanusa na Katawan ed saray pigaran totoo tan sigput to ran pinapatey.

¹⁴Ineekal na Katawan ed pakayari iray arari tan insasalat tod sikaray totoon lalon mapaabeba.

¹⁵Binabagut na Katawan iray bansa tan insasalat tod sikaray lalon mapaabeba.

¹⁶Tinatalo na Katawan iray impirio tan sigput ton dinederal iray dalin da.

¹⁷Sigput ton dinederal iray arum, kanyan ag la ran balut nanunotan.

¹⁸Ag balut ginetma na Manamalsa a magmaliw a mapaatagey tan maruksa iray totoo.

¹⁹Siopay toon manepeg a mangawat na kagalangan? Saray katoowan, lapud tatakotan na saray totoo so Katawan. Siopay aliwan manepeg a mangawat na kagalangan? Saray katoowan, lapud susumlangen na saray totoo iray ganggan na Katawan.

²⁰Nepeg a pagalangan na saray ontotombuk ed sikato so pangulo, tan papagalangan na Katawan iray walay takot ed sikato.

²²Saray totoon mayaman, saray bantug, tan saray mairap-bilay et ipapasirayew day itatakot dad Katawan.

²³Aliwan duga so pangipolisay na kagalangan ed sakey toon mairap so bilay to, balet ta maotek, tan aliwan duga so pangiter na kagalangan ed toon makasalanan.

²⁴Napagalangan iray totoon bibirbiren, saray manoley, tan saray huis, balet anggapod sikaray matalona nen say toon tatakotan toy Katawan.

²⁵Nawalaan na saray bolus ya ombaley a manlingkur ed sikato so sakey ya aripen a makabat; tan no makalakal ira ag ira onsumlang.

²⁶No gawaen moy kimey mo, ag mo ipapanta so karunongan mo, tan ag ka mampapanta no wala kad gunigon.

²⁷Maung ni so mankimey tan walaan ka na masoluk nen say nakaukolan mo, nen say manliber-liber kan mampapasirayew balet narasan ka.

²⁸Anak, pansiansiam a pagalangan so inkasika, balet mansiansia kan mapaabeba. Pablim so sikan dili onung na tuan kablian mo.

²⁹Anggapoy nibaraan na sakey a toon leglemewen toy sikaton dili. Anggapoy toon pagalangan toy toon anggapoy panamagalang tod sikaton dili.

³⁰Napagalangan iray totoon mairap so bilay lapud makalakal ira, tan napagalangan iray mayaman a totoo lapud mayaman ira.

³¹No napagalangan so too legan a mairap so bilay to, nunot mo so ontan lan pakagalangan to no onyaman! No nabalaw so sakey a too legan ton mayaman, nunot mo so ontan lan pakabalaw to no magmaliw a mairap so bilay to!