Read Pangasinan SIRAC 12 Bible Online

SIRAC 12 - Pangasinan bible

SIRAC 12

¹"No manggawa kay maung a bengatla, sigurom ya amtam no siopay makakagamur na kaabigan; diad ontan ag nadarak so gagawaen mo.

²"Nabayaran ka lapud antokaman a panangasin ipanengneng mo ed matonung a too. No ag to ka bayaran, say Sankatageyan so mambayar.

³"Anggapoy kaabigan ya onsabi ed sakey a toon maliligliwa ed saray totoon maoges; aliwan matonung itan a gawa.

⁴"Mangiter ka ed saray relihioson totoo, balet ag mo tutulongan iray makasalanan.

⁵"Manggawa kay maung ed saray mapaabeban totoo, balet ag kan balut mangiiter na antokaman ed saray aliwan matonung. Ag mo ra iitdan na kakanen, ta ikana ran sumpad sika so panangasim. Mamidway karakel na gunigon ya iter ed sika na balang maung a bengatlan gagawaen mod saratan a totoo.

⁶"Kabosul a dili na Sankatageyan iray makasalanan, tan dusaen to ra.

⁷"Mangiter kad saray maung a totoo, balet ag mo tutulongan iray makasalanan.

⁸"No panaon na inawa, mairap ya ibaga no siopa ray petepeteg a kakaaro, balet no panaon na kairapan nabirbir mo no siopa ray kalaban;

⁹"taynan ka na anggan saray kakaarom. Balet no maaligwas ka, saray kalaban mo pagmaliwen day sikaran dili a singa kakaarom.

¹⁰Ag mon balut panmamatalkan so kalaban mo; manderal a singa lati so kaogsan to.

¹¹Alwaran mo, tan asikasom so sikan dili, anggan ipanengneng ton mapaabeba lawas. Sikatoy singa metal ya ispiho ya onlati no ag mo ponasan a naynay.

¹²Payorung mod nikawanan mo so kabosul mo, et ag mabayag naamtaan mo ya aalaen to lay pasen na kagalangan mo. Iliram ed abay mo, et gawaen toy polaing a taloen to ka. Diad ontan na birbir moy katwaan na saray salitak, et mapalaloy pagbabawim no nanunotan mo ra.

¹³Anggapoy toon panermenan to ray aketket a totoon managpaamo na oleg odino saray ayayep ed katakelan;

¹⁴anggapo met so toon panermenan to ka no mioolup kad saray makasalanan tan mibabali kad panggagawa ray makapoy.

¹⁵Miolup a magano ed sika so kalaban, balet arawi la no onsabi lad sikay gunigon.

¹⁶Marakep iray salitaen tod sika no papatitan to ka. Mankonkonwarin midadamay ed saray ermen mo, balet pateyen to ka no nawalaan na pankanawnawa.

¹⁷No onsabid sikay gunigon, naalmoan mon manaalagar a mamater ed sika legan a mankonkonwarin tutulongan to ka.

¹⁸Sikatoy nidoman too, lirliren to ray lima to, itangertanger toy olo to, tan iwakwakawak to ray aliwan tuan balitan nipaakar ed sika.