Read Pangasinan SIRAC 14 Bible Online

SIRAC 14 - Pangasinan bible

SIRAC 14

¹"Maliket so toon ag balut nalilingo ed pananalita to, tan ag to nepeg a panirapay ermen na impankasalanan.

²"Maliket so toon walay mareen a konsinsia tan ag ton balut eekaley ilalo to.

³"Aliwan manepeg a magmaliw a mayaman so sakey a toon masiblet. Antoy kana na kuarta ed sakey a toon maigot?

⁴"No manirap ka, pian makatipon kay kayamanan, manitipon ka labat na para arum a totoo. Ikana na arum a totoo so kayamanan mo diad alabas a panaggastos.

⁵"Panoy pangiter mo na mabonluk ed arum a totoo no sisibletan moy sikan dili, no ag mo labay a panliketan so dilin kayamanan mo?

⁶"Anggapo lay lalon makapoy nen say totoon sisibletan toy sikaton dili; sayan kasalanan iiter toy dilin dusa to.

⁷"Ag ginagala no satan a too et makapanggaway kamaungan; ag mabayag ompaway so inkasiblet to.

⁸"Maoges a too so toon masiblet; ibebeneg toy pankaukolan na saray totoo

⁹"tan ag balut napenek ed antokaman a walad sikato. Say inkaagom pakekebeten toy kamarerwa na too.

¹⁰Diad igot da ray arum a totoo, ag nainan na tinapay so dilin lamisaan da.

¹¹Apiger mon asikasoen so sikan dili onung na anggaay nayarian mo, tan mangyakar ka na manepeg a bagat ed Katawan.

¹²Ag mo lilingwanan ya onsabid sikay patey, tan ag ni nibagad sika no kapigay isabi to.

¹³Kasakbayan na isabi to tan ya agew, kasian mo ray kakaarom; mabonluk tan mangiter ed anggaay nayarian mo.

¹⁴Ag mo aabuloyan a napalabas so sakey ya agew ya ag ka nanliket. No walay labay mon gawaen ya ag onsumlang ed ganggan, gawam labat.

¹⁵Onsabiy agew a naapag-apag ya amin iray nanlingetan mo tan niiter ed saray arum a totoo.

¹⁶Kanyan mangiter kan mabonbonluk; balet panliketan mo met so mangawat na antokaman a manlapud arum a totoo. Paliket moy sikan dili, ta anggapoy antokaman a liket ed pasen a panaayaman da ray inaatey.

¹⁷Ondaan a singa abel so laman na too. Ibabaga na dagdaan a ganggan a nepeg tayoy ompatey.

¹⁸Singa bolung na masalumpapak a kiew iray katoowan. Sasalatan na balon bolung iray napepelag; ompapatey iray arum ed sikatayo, balet ninianak iray arum.

¹⁹Naboluk tan naandi ya amin iray ginawa na limay too, a kabansag da ray nanggawad sikara.

²⁰Maliket so toon mandadalepdep nipaakar ed Kakabatan tan ikakana toy kalakal to.

²¹Siopamay manaaral na saray totontonen et naaralan to met iray iyaamut na Kakabatan.

²²Osilan moy Kakabatan a singa umaanup a manaanap na ayep a labay ton kenaen.

²³Takiling kad saray bintana to tan dengel kad saray puirta to.

²⁴Iliram so tuldam ed sankaasinggeran ed abung to,

²⁵et nawalaan kay sankaabigan a pasen a panayaman mo.

²⁶Ipaalagey moy abung mod man, pian arawid kaatapan diad silong no saray manangyagel iran sangasanga to, tan nasiruman ed petang na agew.