Read Pangasinan SIRAC 15 Bible Online

SIRAC 15 - Pangasinan bible

SIRAC 15

¹"No tatakotan moy Katawan, gawaen mo ya. Iyolom so Ganggan, et narumog moy Kakabatan.

²"Onsabi so Kakabatan tan maliket a mangawat ed sika a singa sakey ya ina odino sakey a malangwer a nubia.

³"Itdan to kay kakabatan tan pakatalus a singa kakanen tan danum.

⁴"Manmatalek kad sikato, et ag kan balut napelag ed kababaingan.

⁵"Pagmaliwen to kan lalon galgalangen nen saray kakaabay mo; no mansalita kad tipon da ray katoowan, itdan to ka ray dugan salita.

⁶"Narumog mo so liket tan tuan gayaga; nanunotan ya anggad angga so ngaran mo.

⁷"Balet saray totoon makulang-kulang odino makasalanan et ag dan balut nalinggis so Kakabatan.

⁸"Anggapoy pibabali tod saray totoon mapaatagey; ag ton balut onloloob ed kanunotan da ray matila.

⁹"Aliwan manepeg ed sakey a makasalanan so pankanta na saray imno na dayew, lapud aliwan matwa so panangigalang to.

¹⁰Nepeg a balikas na kakabatan so sakey ya imno, impuyan a dili na Katawan.

¹¹Ag mo teteteley Katawan lapud kasalanan mo; ag gagawaen na Katawan so antokaman a kabosul to.

¹²Ag mo ibabagan imbalang to ka; ag to nakaukolay tulong na saray makasalanan diad panumpal tod saray getma to.

¹³Kabosul na Katawan so amin a klasiy kaogsan, tan saray walay takot ed Katawan et anggapoy narurumog dan marakep ed kaogsan.

¹⁴Nen diad gapoy gapo et pinalsa na Katawan so katoowan, pinaolyan to ran bolus a manggawa na labay da.

¹⁵No labay mo, nayarin onuren mo ray ganggan na Katawan. Nayarian mon pilien so magmaliw a matoor ed Katawan odino andi.

¹⁶Inlira tod arap mo so apoy tan danum; gawat ka tan alam so labay mo.

¹⁷Nayarian mon pilien so bilay odino say patey; naalam so labay mon pilien.

¹⁸Malaknab so kakabatan na Katawan tan baleg so pakayari to tan nanenengneng toy amin a bengatla.

¹⁹Amta ton amin so gagawaen na too, tan aasikasoen to ray walay takot ed sikato.

²⁰Ag ton balut ingganggan so siopaman a magmaliw a maoges odino initdan to na abuloy so siopaman a mankasalanan.