Read Pangasinan SIRAC 16 Bible Online

SIRAC 16 - Pangasinan bible

SIRAC 16

¹"No andi-kakanaan iray anak, ag panogagepan so baleg a pamilya. Ag nikinon iray lalakin anak ya anggapoy Dios da.

²"Anggan anto lay karakel na anak mo, ag mo ikikinon likud no walay takot da ed Katawan.

³"Ag ka maniilalo na baleg ed arapen da odino maniilalon mambilay ira na andokey. Maung ni so sakey ya anak a gagawaen toy linawa na Katawan nen say sanlibon anak ya ag da gagawaen so linawa na Katawan. Maung ni so onla kad lobuk mo ya anggapon balut so anak mo nen say wala ray anak mon anggapoy Dios da.

⁴"Nayarin ondakel so bilang na totoo ed sakey a siudad lapud kakabatan na sakey a too, balet naandipat ya amin iray kabyangan na sakey a tribu lapud mananumpa rad ganggan.

⁵"Amimpigapiga lay impakanengneng ko na onya ran bengatla tan akadngel ak ni saray lalon malinew ya agawan panmarmaran.

⁶"Ompugso so manliub a pasnuk na Katawan sumpad saray daiset a tipon da ray makasalanan odino diad sakey a bansan mananumpa.

⁷"Ag to pinirdona ra may alan nen saman a linmabad ed sikato, saramay alan a mataletalek ed biskeg dan dili.

⁸"Kinabosul toy panagpaatagey da ray totoon kabandaan nen Lot, tan ag to ra impaliis ed dusa.

⁹"Ag to kinasian imay bansa a dineral to lapud saray kasalanan to;

¹⁰ontan met ed saramay anem a lasus a libon totoon mankukurang ed kalawakan a nantitipon a linmaban lapud awet na olo ra.

¹¹Anggan bilang walay sakey a toon anawet so olo to, sakey a milagro no apaliisan toy dusa. Mapangasi so Katawan, balet nayarian to met so mampasnuk. Nayarin malaklaknab so panamirdona to odino say pasnuk to.

¹²No panoy kabelat na pananusa to, ontan met so kabaleg na panangasi to. Sisintinsiaan to ray totoo onung ed saray gawa ra.

¹³Anggapoy makasalanan a nibatik to ray tinakew to. Tumangan na Katawan so anos na saray matonung a totoo;

¹⁴Natumangan so balang toon matonung; naala na balang too so kanepegan to.

¹⁷Ag mon balut ibabaga, Iyamutan koy Katawan. Anggapoy makanunot ed siak diman ed tagey. Panon a naimano ak diad pegley na ontan lan karakel na totoo? Dakerakel a tuloy iray pinalsa; antoy kablian ko?

¹⁸No onsabi so Katawan onggiwgiw ya amin so bengatla: say dalin tan say maawang a danum ed dalem to, say tawen tan say katawenan ed tagey to.

¹⁹Nayegyeg iray kapalandeyan, tan nayakayak iray pundasion na dalin no onnengneng ed sikara so Katawan.

²⁰Ag ak iimanoen na Katawan. Anggapoy walad amin a totoo so gagawaen ko.

²¹Anggapoy makalikas no mankasalanan ak tan maamut ya aliwa ak a matoor.

²²No manggawa ak na duga, anggapoy mangibaga ed Katawan na nipaakar ed gagawaen ko. Siopay malabay a manalagar ed sikato? Agaylay tantan ton manggawa ed imbaga ton gawaen to.

²³Say toon anggapoy kalakal to, makulang-kulang tan aliway inkabangat to so mannunot labat na onya.

²⁴Anak, dengel ka tan asikasom so ibagak ed sika; makagamur kay pakaamta no ondengel ka.

²⁵Itdan to kay ambelat tan tuan bilin.

²⁶Diad gapoy gapo say Katawan ginawa toy kimey ton panagpalsa, tan initdan toy balang bengatla na dilin pasen to.

²⁷Inlira toy amin a bengatla diad andi-anggan ya oksuy tan impaakseb toy ley ya ando lan andon onya. Anggapoy anggan sakey a parti na pinalsa a naerasan; anggapoy partin nakesawan odino ontondan mankimey.

²⁸Ag manseseksekan iray parti, tan ag da susumlangen so salita to.

²⁹Nen ginaway Katawan ya amin ira ya, ninengneng toy dalin tan pinano to na saray maung a bengatla.

³⁰Minakmakan to na amin a klasiy pinalsa a nepeg day ompatey tan ompawil ed dabuk.