Read Pangasinan SIRAC 17 Bible Online

SIRAC 17 - Pangasinan bible

SIRAC 17

¹"Insan minoli na Katawan ed dabuk iray totoo, insan to pinapawil ed dabuk so balang sakey ed sikara.

²"Initdan to ray agetaran a panaon na pambilay, balet initdan to ray pakaoley ed amin a bengatla diad tapew na dalin.

³"Ginawa to ran kaolibay to, tan inter tod sikara so dilin pakayari to.

⁴"Ginawa ton antakot ed sikara iray amin ya arum a pinalsa; initdan to ray pakaoley ed amin ya ayep tan amin a manok.

⁶"Initdan to ra na kadilaan da, saray kamataan da, saray kalayagan da, saray kanunotan da, tan saray konsinsia ra.

⁷"Pinano to ra na pakaamta tan pakatalus tan impanengneng tod sikara so pandomaay maung tan maoges.

⁸"Inter tod sikara so dilin kakabatan to, ta labay ton ipanengneng ed sikara so kagalangan na saray pinalsa to.

¹⁰Idayew day masanton ngaran to tan ibawag day inkatalonggaring na amin a gagawaen to.

¹¹Ginawa toy pakaamta a nayarin gamuran da tan initdan to ray Ganggan a panlalapwan na bilay.

¹²Akisipanan ed sikara ya ando lan ando tan impaamta tod sikara iray ganggan to.

¹³Anengneng day kagalangan na katagyan to tan nadngel day kagalangan na bosis to.

¹⁴Pinasakbayan to ra sumpad ag inkatonung tan imbangat tod balang sakey a too no antoy kanepegan ton gawaen ed arum a totoo.

¹⁵Amta lawas na Katawan so gagawaen na saray totoo; anggapoy polaing a pakaamut ed sikato.

¹⁷Initdan to na manoley so balang bansa, balet kayaryan a dili na Katawan so Israel.

¹⁹Babantayan lawas na Katawan so gagawaen na saray totoo; singa kaliwaway agew ed sikato so balang bengatlan gagawaen da.

²⁰Anggapoy kasalanan dan akaamut ed sikato; amta to ran amin.

²²No mangiter tayod saray mairap-bilay, say Katawan ipasen ton singa mablin singsing. Mablin singa bilay ed sikato so panangasi na too.

²³Sintinsiaan to naani iray maoges a totoo tan dusaen to ra; awaten day kanepegan da.

²⁴Balet abuloyan na Katawan ya ompawil ed sikato iray magbabawi. Iitdan to lawas na biskeg na linawa iray nababalang day ilalo ra.

²⁵Dago ka ed Katawan, tan taynan moy kasalanan mo. Masimoon ya ipikasim a tulongan to kan mambilay na lalon marakep.

²⁶Pawil ka ed Sankatagyan tan ibeneg moy kasalanan. Bosulbosul moy kaogsan.

²⁷Makapangiter na saray pisasalamat ed Katawan iray mabilay, balet makapankanta kasi na dayew ed Sankatagyan so siopaman a walad pasen a panaayaman da ray inaatey?

²⁸Say toon mabilay tan mabiskeg et makapankanta na saray dayew ed Katawan, balet saray inatey, ya ag la ra mambibilay, et ag la ra makapangiter na pisasalamat ed Katawan.

²⁹Agaylay kabaleg na mapangasin panamirdona na Katawan ed saray onsisingger ed sikato!

³⁰Balet aliwan onya so inkatoo na saray totoo; anggapod sikatayoy ag ompatey.

³¹Anggapoy maliwawa ni nen say agew, balet anggan say liwawa na agew et ag onsinag legay kalipsi. Agaylay inomay a nakalipsi na kaogsan so kanunotan na too!

³²Say Katawan nanengneng ton amin iray bitewen ed tawen. Saray katoowan et dabuk tan dapul ira.