Read Pangasinan SIRAC 18 Bible Online

SIRAC 18 - Pangasinan bible

SIRAC 18

¹"Say Katawan, a mambibilay ya ando lan ando, et pinalsa to so sansinakuban,

²"tan sikato labat so matonung.

⁴"Ag to initdan so siopaman na pakayarin makapangipaliwawa no anto ray ginawa to, tan anggapoy sigput a makasokay.

⁵"Siopay makasukat na ontan lan kabaleg na pakayari to? Siopay sigput a makapangipaliwawa na saray mapangasin gawgawa to?

⁶"Anggapoy nayarian tayon iyarum ed sikara; ag tayo ra nayarian a bawasan. Anggapoy polaing na pantalus na makapakelaw iran bengatla a ginagawa na Katawan.

⁷"No asabi tayo lay samput na istoria, ag tayo ni anggan nigapo; ag tayo amtay ibaga tayo.

⁸"Anto so too? Antoy kana to? Say kamaungan a gagawaen tosay kaogsan a gagawaen toantoy kabaliksan dan amin?

⁹"No mambilay so too na sanlasus a taon, nidoman dokey na bilay so impanbilay to,

¹⁰balet no ipara ed intiron ando lan ando, saraman a taon et singa ra sakey a terter na danum ed dayat, singa sakey a buer.

¹¹Sikato yay makasengeg ya ontan lay anos na Katawan ed sikatayo, no akin et mabolbolus so panangasi to.

¹²Onnengneng ed sikatayo tan amta to a mansumpal itayod patey; sikato yay makasengeg a maliket a mamirdonad sikatayo.

¹³Nayarin aroen na sakey a too so kabat to, balet inaro na Katawan ya amin iray katoowan. Pepeteken to itayo; pepegetan to itayo; ibabangat to itayo. Ipapawil to itayo ed sikato a singa pumapastol ya aasikasoen to ray karniro to.

¹⁴Kasian to itayo no awaten tayoy panangiwanwan to tan pampilalekan tayon ipanengneng tod sikatayoy pakalilingoan tayo.

¹⁵Anak, no tulongan moy sakey a too, ag mo pamapasnukan met. No mangiter kay rigalo, ag ka mangibabalikas na antokaman a makapasakit.

¹⁶Ambelat ni ray salitam nen saray iiter mo. Anggan say linaew mangiiter na inawa no panaoy ampetang.

¹⁷On, dakel niy nagawaan na marakep iran salita nen saray sankaabigan a rigalo, et no tuan walay panangasim iter mo ran dua.

¹⁸Inkakulang-kulang so ag pangasi tan pamabaing. Ag linggisen na siopaman so rigalon aliwan mabolus a niiter.

¹⁹Amtaen mo nin onona so labay mon ibaga kasakbayay pansalitam, tan asikasom so laman mo kasakbayan kan mansakit.

²⁰Sokayan mo nin onona so konsinsiam kasakbayay panintinsia na Katawan ed sika; diad ontan, pirdonaen ka na Katawan no onsabiy panintinsia to.

²¹Mampaabeba ka kasakbayay pakaiter ed sikay dusan sakit. No nankasalanan ka, ipanengneng moy pagbabawim.

²²No mansipan kad Katawan, sumpal mon masaksakbay. Ag mo aalagden a patey-pateyan ka la, insan mo sumpalen.

²³Balet kasakbayay pansipan mo, mamparaan kan manumpal. Ag mo susubokey anos na Katawan.

²⁴Mannunot ka! Labay mon ampetang so olo tod sika diad agew na ipatey mo?

²⁵No wala lay amin a nakaukolan mo, nunot mo no antoy kipapasen na narasan, antoy kipapasen na mairap-bilay.

²⁶Nayarin naoman iray bengatla diad loob na sanagew; nayarian na Katawan so onggalaw a masiglat.

²⁷No makabat ka, maalwar ka ed amin a gawaen mo. No walad kaliber-liber moy kasalanan, alwaran moy ag mo pakapankasalanan.

²⁸Nabirbir na balang maotek a too so kakabatan tan pagalangan toy balang toon mangipapanengneng na Kakabatan.

²⁹No panliketan moy kakabatan no narengel mo, magmaliw kan makabat, tan magmaliw a panlapwan na kakabatan a para arum a totoo iray salitam.

³⁰Ag ka papaoleyan na maoges a liknaan mo; adyaan mo ray maoges a pilalek na laman mo.

³¹No abuloyan mon napenek so amin a pilalek mo, elekelekan ka na saray kalaban mo.

³²Ag ka mambibilay na sawasawaan ta deralen to ka.

³³Ag mo pagmamaliwen so sikan dili a mipapayabol diad panggastos mo na alablabas ed baleg a ponsia lapud panutang mo, ta anggapoy malaem a kuartam.