Read Pangasinan SIRAC 19 Bible Online

SIRAC 19 - Pangasinan bible

SIRAC 19

¹"No gawaen mo ya, ag kan balut onyaman; no ag mo isingansingan iray ankekelag a bengatla, mankalkalnan deralen moy sikan dili.

²"Say alak tan saray bibii panggawaen da ray totoon makalakal na maoges iran bengatla. Magmaliw lan magmaliw ya anggapoy adya so lakin arapen to ray marotak a bibii,

³"et sayan panagbilay ya anggapoy adya so makasengeg na ipatey to. Kanen na saray bigis so naboboluk a laman to.

⁴"Inkakulang-kulang so panmatalek a tampol ed saray totoo. No mankasalanan ka, papasakitan moy sikan dili.

⁵"No panliketan mo so kaogsan, nasintinsiaan kay dusa.

⁶"Paliisan moy pansalita na andi-kakanaan, et napaliisan moy dakel a gunigon.

⁷"Ag mon balut ooliten ya ibaga so narerengel mo, et anggapoy pagbabawian mo.

⁸"Ag mo ibabagad saray kakaarom odino saray kalaban mo, likud no pakapankasalanan mo so ag mo pangibaga.

⁹"Nudnunoten na siopaman a makadngel ed sika, et ag mabayag kabosulen to ka lapud nadngel to.

¹⁰Akadngel ka lay labir ya anggapoy katwaan to? Ememan mod sikan dili labat. Mampasebeg ka! Ag to ka pateraken.

¹¹Say toon makulang-kulang ya eememan toy nepeg ya iyamut et manliliknay kairapan a singa biin mampapasakit.

¹²Diad oras a makadngel na iyaamut, singa panan nipanek ed ulpo to.

¹³No narengel mon nanggawa na makapoy so sakey a kaaro, tepetan mo na nipaakar ed ginawa to. Nayarin aliwan tuay nadngel mo. No tua, ag to oliten a gawaen.

¹⁴No narengel mon walay imbaga na sakey a kaabay, tepetan mo na nipaakar ed imbaga to. Nayarin ag to imbaga. No imbaga to, ag to la oliten ya ibaga.

¹⁵No narengel moy bengatlan makapoy a nipaakar ed sakey a kaaro, tepetan mo na nipaakar ed nadngel mo. Nayarin tilay nadngel mo. Ag mo sisisiaen ya amin so narerengel mo.

¹⁶Nayarin mangibagan bengatbengat so sakey a too na bengatla, balet et panggagalaw to labat. Akapankasalanan so balang too nipaakar ed saya.

¹⁷No makarengel kay bengatlan pakapasnukan mo ed kaabay mo, tepetan mo na nipaakar ed nadngel mo kasakbayan a taktakoten mo. Ipalimam la yad Ganggan na Sankatagyan.

²⁰Takotan moy Katawan tan sumpal mo ray Ganggan to; sikato yay labay ya ibaga a Kakabatan.

²²Nayarin naamtaan moy amin ya amtaen nipaakar ed kaogsan, balet ag to ka tan pagmaliwen a makabat. Andid kalakal so itombuk ed simbawa na saray makasalanan.

²³Nayarin ikana so inkasilib ed maoges iran getma, balet wala ray totoon singa makulang-kulang so kagagawa ra lapud anggapoy amta ra.

²⁴Maung ni nen say sankasiliban a makasalanan so sakey a toon matonung, anggaman ya aliwan maotek.

²⁵Nayarin mapalalon tuay inkasilib mo balet matila ka; nayari met ya alaen moy labay mo diad panamegley na aliwliwan pitotoo.

²⁶Insan wala ray totoon maoges a manliliber a nengneng day masansanto tan maerermen, balet papalikdoen da ka labat.

²⁷Ilingaw day lupa ra ed biek tan konwarin ag da ka narerengel, balet anamutan day pankanawnawa rad sika no ag mo iilaloan.

²⁸No ag ni ra makapankasalanan natan lapud walay makasengeg, diad ononan pankanawnawa ra gawaen da.

²⁹Naamtaan mo no siopa so sakey a too diad panamegley na nengneng to. Diad ononan pannengneng mod sikato, nibagam no walay kalakal to.

³⁰Nipapanengneng so ogali to diad panamegley na panangawes to, say kakaelek to, tan say panangakar to.