Read Pangasinan SIRAC 21 Bible Online

SIRAC 21 - Pangasinan bible

SIRAC 21

¹"Anak, nankasalanan ka? Ag mo ooliten tan kerew kay pirdona lapud saray ginawam.

²"Arawian mon singa oleg so kasalanan. No kapaasingger kad kasalanan, iketket tod kamarerwam iray ngipen to a singa lion, tan deralen to ka.

³"Amin a gawan sumpad ganggan mangitilak na ag onabig a sugat, a singa sinigbat na duaray tarem ya ispada.

⁴"No malastug tan mapaatagey so sakey a too, nayarin nabalang toy amin a kayaryan to.

⁵"No mampikasi ray totoon mairap-bilay, dengelen ira na Dios tan ebatan ton tampol iray pikakasi ra.

⁶"No ag mo labay ya akoen so panametek, mankakasalanan ka; tan no tatakotan moy Katawan omamen mon petepeteg so kagagawam.

⁷"Nayarin bantug a manalita so sakey a too, balet no sikatoy alingo, nibiig na sakey a toon makalakal.

⁸"Say toon ombabayes na kuartan pamaalagey toy abung to et manitipon labat na saray baton panggaway pantion to.

⁹"Singa bunton na kusot so tipon na totoon ag mangabkabilangad Ganggan; onliub so kasumpalan da.

¹⁰Mablak tan patar so dalan a pankukurangan na saray maksalanan, balet mamapaarap ed pasen a panaayaman da ray inaatey.

¹¹Siopamay labay ton onuren so Ganggan nepeg ya amtaen toy kabaliksan na Ganggan. No walay peteg a takot mod Katawan, walay kakabatan mo.

¹²Nepeg a maotek ka, pian naaralan moy anggan anton bengatla; balet wala tay pankonkoanan labat a maotek a pakaongangetan na saray totoo.

¹³Say pakaamta na toon makabat et singa ilog ya ag balut nanaekatan, singa lawas managagos a kolus na maung a simbawa.

¹⁴Balet say toon a makulang-kulang singa bangan botaw so kanunotan to; nabalang a tampol so antokaman a nanaaralan to.

¹⁵No narengel na toon walay aral so bengatlan napnoy kakabatan, pataremen toy isip to tan iwanwan tod arum iran kanunotan. Balet no say makadngel et say toon maliket lad kipapasen ton anggapoy amta, ag to labay, tan lingwanan ton tampol.

¹⁶Say pandengel ed toon makulang-kulang et singa panaakar a walay ambelat a sankasakbat mo, balet makapaliket so pandengel ed ibabaga na maotek a too.

¹⁷Mampilalek ya ondengel ed toon maotek so tipon na totoo tan motekteken da ray ibabaga to.

¹⁸Diad toon anggapoy amta, say kakabatan et andi-kakanaan a singa abung ya aderal-deral. Ag to anggan balut ninunot so nipaakar ed saray bengatlan sigsiguradod sikato.

¹⁹Diad toon anggapoy kalakal, singa pusas so aral,

²⁰balet diad toon makalakal, singa balituk a pulsiras. Ngalngali ag nalikas so kakaimis na toon maotek, balet manlaldak so elek na toon makulang-kulang.

²²Say toon makulang-kulang ontakiling ed puirtay abung na sakey a too, insan onloob lan tampol, balet say toon walay salsalid bilay tan marakep so kagagawa to et manalagar ed paway na puirta lapud panamagalang to.

²⁴Aliwliwan kagagawa so pandengel ed saray puirta tan siopamay maung so kagagawa to et ambaing a manggawad saya.

²⁵Saray totoon malabir tongtongen da ray nipaakar ed bengatlan ag da nepeg a pibabalian, balet nununoten na saray totoon makabat so pansumpalan na ibabaga ra.

²⁶Sasalitaen na saray makulang-kulang so antokaman ya onsasabid kanunotan da; mannunot ni kasakbayan a mansalita iray totoon makabat.

²⁷No isasamba na toon maoges so kalaban to, isasamba toy sikaton dili.

²⁸Dederalen na toon managtalabutob so dilin ogali to, tan kabosul na amin a kaabay to.