Read Pangasinan SIRAC 22 Bible Online

SIRAC 22 - Pangasinan bible

SIRAC 22

¹"Anggapoy pidomaan na totoon mangiras ed tai na ayep; manangipolisay ira tan anggapoy malabay ya onabay ed sikara.

³"Kababaingan na ama a walay anak ton ag napetek, lautla no sakey a bii.

⁴"Makapiasawa so makalakal a biin anak, balet say andi-baing ya anak a bii mangiter na ermen ed ama to.

⁵"Say biin aliwan masimpit ipelag tod kababaingan so asawa to tan say ama to; anggapod sikaran duay ag ombaing ed sikato.

⁶"No maminsan say pansalita ed saray anak nayarin aliwan manepeg a singa say pankanta ed saray maneermen, balet kakabatan a kapiganman so panlewet lapud panametek.

⁷"Say pambangat ed sakey a toon makulang-kulang et singa pangikula ed nabtag a banga, singa pamangon ed sakey a toon malmalet so ogip to.

⁸"Say pangipaliwawa na bengatla ed sakey a toon makulang-kulang et singa pangipapaliwawa na bengatla ed sakey a toon makakaogip; no asumpal mo lan impaliwawa, ikuanto, Anto man so ibabagam?

¹¹Eermenan tayo ray totoon makulang-kulang ta kulang so liwawa ed sikara. Nepeg tin ermenan iray makulang-kulang, ta kulang so pakatalus a walad sikara. Diad tuay tua, nepeg a mapalaloy panermen tayod sikara, lapud makapasinagem ni nen say patey so bilay da. Maung labat ta mamapainawa la ray inatey.

¹²Pitoy agew a lalamayan tayo ray inatey, balet ermen ed intiron bilay so iiter na toon makulang-kulang odino anggapoy Dios.

¹³Ag mo bibisitaen iray totoon makulang-kulang odino pitongtongan iran mabayag. Paliisan mo ra; diad ontan, ag da ka natanggoyur ya onalig ed sikara, et makapambilay ka ed kareenan ya ag ka nagunigon odino naingungotan lapud kalukowan da.

¹⁴Ambelat nin sakbaten ira tan a totoo nen say mital; tan say saksakey labat a salitan onnepeg ed sikara et makulang-kulang.

¹⁵Anlemew nin awiten so kargan buer, asin, tan balatyang nen say toon makulang-kulang.

¹⁶Nayarin diad inkaelet na pangipeket na tablan panuksolan ed sakey a paalagey et ag naekal anggan ondalan so yegyeg, nayarin diad inkamaung na pangipasal ed sakey a too a mangikana na isip tan kalakal to et maseksekder ya akatalindeg no panaon na kairapan.

¹⁷Say panagnunot a maung tan malinew et singa malmalet a padir tan marakep iray dikorasyan to.

¹⁸Say melag a baton walad tapew na padir et ag mansiadsiad kawalaan to no onsiplug so dagem, tan say toon mabaing lapud saray andi-kabaliksan a kanunotan to et ag makatalindeg no onsabi ray makapataktakot a panaon.

¹⁹No toruken moy matam, onlua; et no nasakisakitan moy liknaan na sakey a too, naamtaan moy petepeteg a liknaan to.

²⁰No tupaken mo na bato iray manok, nasibwak mo ra; et no pabaingan moy sakey a kaaro, deralen moy pankaaro yo.

²¹Anggaman ya ampetang so pisangsangan mod sakey a kaaro, tan ansakit so pansalitam, ag ni abalang ya amin. Nayarian mo niy mipulangan ed sikato. Balet taynanan ka na anggan siopan kaaro no pabaingan mo, no mapaatagey ka, no ipaamtam iray iyaamut to, odino pabenegan mon dogpaan.

²³No mairap so bilay na kaabay mo pikaaroan mo; diad ontan makapinabang kad liket to no onaligwas so bilay to. Ag mo papaolyan no walad gunigon, no labay mon makapinabang ed sikato no onsabid sikato so panaon na inawa.

²⁴Asewek nin onona so ompaway kasakbayay apoy; panamabaing nin onona so nagawa kasakbayay pamatey.

²⁵Ag ak balut ontakot a mangyagel ed sakey a kaaro, tan ag kon balut taynan so kaaron nakaukolan to ak.

²⁶No manlikna ak na kairapan lapud sikato, manalwar ed sikato so balang sakey a makapikabat ed agawa.

²⁷Oy la komun a walay niiyan a mambantay ed sangik, pian maung so kapepetan na saray bibil ko. Napaer ak ed satan a nalingo tan nipaliis ak ed pakaderal koy siak a dili diad panamegley na dilak!