Read Pangasinan SIRAC 24 Bible Online

SIRAC 24 - Pangasinan bible

SIRAC 24

¹"Dengel kayod Kakabatan! Ikikinon toy pankakanta to ray dilin dayew to ed arap da ray Israelita, saray dilin totoo to,

²"diad tipon na Sankatageyan, diad arap na pakayari to.

³"Siak so salita a sinalita na Sankatageyan Kinobutan koy mundo a singa kelpa

⁴"Ginawak ed sankatageyan a tawen so abung ko, diad lusek a lorem so tronok.

⁵"Nanakar ak a bukbukor diad kaliber-liber na limpek na tawen tan nanakar ak a binmeltang ed dayat diad dalem na dalin.

⁶"Nanoley ak diad intiron mundo tan saray daluyon na dayat, diad amin a bansa, diad amin a katoowan.

⁷"Ninmengneng ak ed amin a pasen a mananap na panayaman, diad sakey a parti na mundo a panggawaan koy abung ko.

⁸"Insan say Manamalsak ya amalsad sansinakuban imbaga tod siak so pasen a panayaman ko. Manggawa kad Israel na abung mo kuanto, Saray kabyangay boleg nen Jacob so magmaliw a totoom.

⁹"Pinalsa to ak diad ando lan ando, kasakbayan a ginmapo so panaon, tan mansiansiay kiwawalak diad anggad angga ya onsabi.

¹⁰Nanlingkur ak ed sikato diad masantod Tulda insan nanggawa ak na abung ko diad Palandey na Sion.

¹¹Impanayam to ak ed Inararon Siudad tan initdan to ak na pakaoley ed Jerusalem.

¹²Nanlamut ak ed pegley da ray gagalangen a totoo a pinili na Katawan a kayaryan to.

¹³Binmaleg ak a singa saray kiew a sidro ed Libano, singa saray sipris ed Palandey na Hermon,

¹⁴singa saray kiew a palmira na En-gadi, singa saray rosas na Jerico, singa saray mararakep a kiew na oliba diad kaalogan, singa saray kakiewan a platano diad abay na danum.

¹⁵Singa angub na pabalingit a kanila so ingas ko, singa mansamyong a pabalingit tan sankaabigan a mira, a nanlauk na astakti, onita, tan galbano, say ambalingit ya insinso diad masanton Tulda.

¹⁶Singa kiew a robli ya isasalumpapak ko ray sangak, marakep tan balibali.

¹⁷Singa wakal na ubas a papawayen ko ray marakep a simit ko; nagmaliw ya amayamay tan marakep a bunga iray rosas ko.

¹⁹Dago kayod siak, amin yon malabay ed siak, tan mampesel kayod saray bungak.

²⁰Nanunotan yo ak a masamit ni nen say dilo, maung ni nen say dilon nanlapud obung na bayaung.

²¹Akan yo ak, et mampilalek ki nin mangan; inom yo ak, et mampilalek ki nin oninom.

²²Onur yo ak, et ag kayon balut nabaingan; gawa yoy ibabagak, et arawi kayod kasalanan.

²³Say Kakabatan et say Ganggan, say Ganggan ya imbilin nen Moises ya onuren tayo, say sipanan na Sankatageyan a Dios, say tawir na saray sinagoga na Israel.

²⁵Manlelepwas na Kakabatan so Ganggan a singa Ilog na Pison, singa Ilog na Tigris no panaon na panagborbor na bungay tanaman.

²⁶Napnapno na pakatalus so Ganggan a singa Ilog na Eufrates, singa Ilog na Jordan no panaon na panagani.

²⁷Mankirkirlap na saray bangat a singa Ilog na Nilo, singa Ilog na Gihon no panaon na panagborbor na ubas.

²⁸Aliwan sigput so impakaamta na ononan pinalsan too ed Kakabatan, tan ag naamtaan a sigput na samput a too.

²⁹Maawang nen say dayat so kanunotan na Kakabatan; aralem ni nen saray sankaaraleman a danum ed dalem na dalin so simbawa na Kakabatan.

³⁰No para siak, impasen koy siak a dili a singa banawang na paranum a mangyaakar na danum ed tanamanan a manlalapud ilog.

³¹Ginetmak a salogen labat iray tanaman kon mambunga tan saray manrosas a tanaman, balet nagmaliw ya ilog so banawang, tan say ilog nagmaliw a dayat.

³²Kanyan ipaparontal kod sikayo so aral ko; bebembenan ko na atagey, pian nanengneng ed anggan iner a pasen so liwawa to, a singa say ompapaway ya agew.

³³Singa apuyanan a propita, iibung ko ray bangat ko, pian napinabangan ira na saray mantombuk a kailalakan.

³⁴Nabirbir yo komun ya aliwan para siak labat so impankimey ko na pinasya, no ag ingen pian natulongan so siopaman a labay toy magmaliw a makabat.