Read Pangasinan SIRAC 25 Bible Online

SIRAC 25 - Pangasinan bible

SIRAC 25

¹"Walay taloran bengatlan nidomadomay pakaliliket kod sikarasaray bengatlan marakep ed Katawan tan too: saray lalakin sanaagi a maung so panoolup da, saray sanaabay a sankakaaro, tan say sanasawan maliket so impankasakey da.

²"Walay taloran klasiy totoo ya ag ko ra naanosan, ta mapalalon makapaingungot so kagagawa ra: saray totoon mairap-bilay a mapaatagey, saray mayaman a mitala, tan saray makulang-kulang a mamasiken a mikakaloguran.

³"Likud a gawaen moy anggaay nayarian mon manaral legan a malangwer ka ni, ag kan balut magmaliw a makabat no ontakken ka.

⁴"Marakerakep a manoolup so dugan panagsintinsia, maung a simbawa, tan olon obanan.

⁵"Manepeg a niwalad toon matakken tan gagalangen so kakabatan, pakatalus, tan dugan simbawa.

⁶"Sankasolung na matakken a totoo so korona na dakel a salsalid bilay tan anggapoy lalon marakep a nikinon da nen say itatakot dad Katawan.

⁷"Ibagak ed sikayo so nipaakar ed samploran klasin totoo ya ipapasen kon kapalaran so impikabat ed sikara, nagkalalo lad kumasamplo: say toon ikikinon to ray anak to, say toon nanengneng ton napepelag iray kalaban to,

⁸"say lakin mapalar lapud walaan na asawan makatalus say sanasawan marakep so impanparis da, say toon ag balut mankakasalanan ed pansasalita to, say toon ag nepeg a mankimey para toon daeg tod donung,

⁹"say toon mapalar lapud walay tuan kaaro to, say toon pakaliliketan a dengelen na saray totoo,

¹⁰tan say toon peteg a matalonggaring: say toon makabat. Balet say sankatalonggaringan ed amin et say toon tatakotan toy Katawan.

¹¹Anggapoy mipara ed sayan too, lapud sankamanonad amin a bengatla so itatakot ed Katawan.

¹³Anggapoy sugat ya aralem ni nen say asugat a puso. Anggapo ray gunigon ya ambelat ni nen saray gunigon ya iiter na bibii.

¹⁴Anggapo ray kairapan a mapalalo ni nen saray kairapan ya iiter na totoon mamobosul ed sika. Anggapoy panagbales a mapalalo ni nen say panagbales na sakey a kalaban.

¹⁵Anggapoy samal a lalon makapatey nen say samal na oleg, tan anggapoy pasnuk a lalon makapatey nen say pasnuk na bii.

¹⁶Labay ko niy manayam ed abung a kawalaay lion odino dragon nen say miamung ed maoges ya asawa.

¹⁷No mamapasnuk so asawan bii, mangoman so nengneng to ya anggad singa mamapasnuk ya uso so nengneng to.

¹⁸Say asawa to nepeg ya onlan mangan ed saray kakaabay to a diman ag to napokpokan so ompait a liknaan to.

¹⁹No iparad saray gunigon ya iiter na bibii, melmelag iray arum a gunigon. Nasagmak komun na onya ran bibii so pansusumpalan na saray makasalanan!

²⁰Say mareen a lakin miaamung ed sakey a biin makolkol et singa masiken ya onkakalab ed mabuer a pokdul.

²¹Ag mon balut dederaley olom lapud ganggana na sakey a bii, tan ag mo sasagyatey sakey a bii lapud mayaman.

²²No lelegpeten na asawan bii so asawa to, andi-duaruwan walay pasnuk, panagpaatagey, tan panagpabaing.

²³Pabelengen tan paermenen a mapalalo na maoges ya asawan bii so asawa to, tan sugatan tod puso. Ipanengneng yod siak so sakey a lakin mabaing ya ag to makapannunot a bukor, et ipanengneng kod sikayoy sakey a biin ag to paliliketen so asawa to.

²⁴Ginmapod bii so kasalanan, tan ompatey itayon amin lapud sikato.

²⁵No panoy ag mo pangyabuloy ya onterter so dipositoway danum mo, ontan met so ag mo pangyabuloy ed maoges ya asawa a gawaen toy labay to.

²⁶No ag to gawaen so ibabagam ed sikato, isian mo.