Read Pangasinan SIRAC 27 Bible Online

SIRAC 27 - Pangasinan bible

SIRAC 27

¹"Amayamay iray totoon nankasalanan legan dan manaanap na pakatuboan da; no labay moy onyaman nakaukolan a pepetan mo ray matam.

²"Mairap ya ekalen so palpal a nipanek ed nanleetan na duaran baton a sakey ya abung; ontan met a mairap ya ekalen so panagsaol ed pansaliw tan panlako.

³"Likud a matway itatakot mod Katawan, nakusbod sika so abung mo.

⁴"Ipapanengneng na pananalita na too iray kasalanan to; singa yakayakan a mangibibiig na dotak.

⁵"Say panagnunot mo et ipapanengneng toy ogalim, a singa say banga et ipapanengneng toy aderal no napopoolan ed palbaan.

⁶"Nibagam no panoy inkaasikaso ed sakey a kiew diad panamegley na saray bunga to, tan nibagam iray liknaan na sakey a too diad panamegley na pananalita to.

⁷"Ag mo nin balut idadayew so sakey a too kasakbayan mon narengel a mansalita; satan so tuan panagsubok.

⁸"No salien moy magmaliw a matwa, nayarian mo tan naparakep mo niy ogalim, a singa say marakep a kawes et paabigen toy alagey mo.

⁹"Saray manok mititipon irad saray kapara ran klasin manok, tan say ogalin inkamatwa nararapat da ray manasalin matwa.

¹⁰Mantatalaran so kasalanan ed saray manaanap na pankanawnawa ran mankasalanan, a singa panaalagar na lion ed nabwag ton ayep.

¹¹No mansalita iray totoon matonung, walay kabaliksan lawas so sasalitaen da, balet susumlangen da lawas so sikaran dili iray makulang-kulang.

¹²No akapilimug kad saray totoon makulang-kulang, mambaraan ka lan ontaynan, balet no kalimug mo ray marunong a totoo, milimug kad sikara ed anggaay nayarian mo.

¹³Makapasakit na linawa iray istorian totongtongen na saray totoon makulang-kulang, tan manlulurey ira nipaakar ed saray sankaogsan a kasalanan.

¹⁴Makapabegas na bago so panangisamba na saratan a totoo. Pampepet na layag mo so nagawaan mo labat no igapo da lay mansasangsangan.

¹⁵Ansakit so pandengel ed sikaran mampapabaingan, tan nayarin mansumpal ed pateyan so pampapabaingan da.

¹⁶No ibagam ed arum iray bengatlan iyaamut a nibagad sika, dederalen moy panagmatalek na arum a totoo ed sika, et ag ka lan balut nawalaan na maasinger a kaaro.

¹⁷Igalang mo ray kakaarom, tan pansiamsiam so panagmatalek mod sikara. No pantraidoran moy panagmatalek na sakey a kaaro, lingwanan mo lalaingen a walay kaarom.

¹⁸Pinatey mo man a pankakaaro, a singa ka angalay ayora tan pinatey moy sakey a kalaban.

¹⁹Naandi lay kaarom. Ag mo la napapawil, a singa ag mo pakapapawil ed limam na manok ya imbolus mo.

²⁰Ag ka la manaabalan ontombuk ed sikato. Naotit ka lan tuloy. Batik lan singa uson nablus ed patit.

²¹Nayarin berberen so sugat tan napirdona so panamabaing, balet no pantraidoran moy panagmatalek, anggapoy lay ilalo.

²²No mankindat ed sika so sakey a too, walay makapoy a kanunotan to, et anggapoy makapatonda ed panumpal na getma to.

²³No kaibam, agaylay dakep na panagsalita to! Idayew toy balang salitan ibabagam. Balet sananey lan tongtongan no akabeneg ka la; ikana to ray imbabagam a panumlang ed sika.

²⁴Anggapo lay bengatla diad mundo a mipara ed pambosul kod saman a klasiy tooet kabosul met na Dios.

²⁵Mangitupak ka na bato a mapmaptek ed tagey, et ompawil ya ondapod olom. Mamekpek ka, et nasugat so anggan sika.

²⁶Napapatitan iray totoo ed saray dilin patit da.

²⁷Saray totoon mamapasakit na arum a totoo et napasakitan met na dilin gawgawa ra tan ag da amta no akin.

²⁸Papabaingan na saray totoon mapaatagey iray arum a totoo tan luludlureyen da ra, balet walay manaalagar a singa lion na pankanawnawa ton ombawid sikara.

²⁹Saray maliket a makanengneng na kapelag da ray totoon matonung et napelag irad patit tan nairapan irad ipatey da.

³⁰Makarimdimla so pasnuk tan say petang na olo, balet wala ra yan dua ed saray makasalanan.